نیوز ڈیسک
ریاض: سعودی عرب کے جنرل ڈائریکٹوریٹ آف سول ڈیفنس نے مملکت کے متعدد علاقوں میں ہفتے کے روز تک بارش کا الرٹ جاری کرتے ہوئے شہریوں کو محتاط رہنے کی ہدایت کی ہے۔
نیشنل سینٹر فار میٹرولوجی کی پیش گوئی کے مطابق، مختلف علاقوں میں درمیانے سے شدید درجے کی بارش اور گرج چمک کا امکان ہے، جبکہ مکہ مکرمہ کے علاقے میں بھی نمایاں بارش متوقع ہے۔
حکام نے خبردار کیا ہے کہ شدید بارش کے نتیجے میں بعض مقامات پر سیلابی صورتحال پیدا ہوسکتی ہے اور روزمرہ معمولات متاثر ہونے کا خدشہ ہے۔ شہریوں کو ہدایت کی گئی ہے کہ وہ احتیاطی تدابیر اختیار کریں اور موسمی حالات کے دوران اپنی حفاظت کو ترجیح دیں۔
سول ڈیفنس نے شہریوں کو نشیبی علاقوں، وادیوں اور بارش کے پانی کے بہاؤ والے مقامات سے دور رہنے کی تاکید کی ہے۔ عوام سے یہ بھی کہا گیا ہے کہ وہ بارش کے دوران پانی جمع ہونے والے مقامات پر جانے سے گریز کریں اور غیر ضروری خطرات مول نہ لیں۔
حکام کے مطابق، موسم کی صورتحال پر نظر رکھی جا رہی ہے، جبکہ شہریوں کو ہدایت کی گئی ہے کہ وہ تازہ ترین معلومات اور حفاظتی ہدایات کے لیے سرکاری ذرائع سے رجوع کریں۔
