اسلام آباد: وزیراعظم پاکستان شہباز شریف نے کہا ہے کہ وطنِ عزیز کے دفاع پر کوئی سمجھوتہ نہیں کیا جائے گا۔ انہوں نے واضح کیا کہ افواجِ پاکستان ہر جارحیت کا منہ توڑ جواب دینے کے لیے مکمل تیار ہیں اور ملک کے امن و استحکام پر کسی صورت آنچ نہیں آنے دی جائے گی۔
وزیراعظم نے کہا کہ عوام اور مسلح افواج ملکی سلامتی اور خودمختاری کے تحفظ کے لیے ہر وقت تیار ہیں۔ افواجِ پاکستان پیشہ ورانہ صلاحیتوں، اعلیٰ تربیت اور مؤثر دفاعی حکمتِ عملی سے لیس ہیں اور کسی بھی اندرونی یا بیرونی چیلنج سے نمٹنے کی مکمل اہلیت رکھتی ہیں۔
شہباز شریف نے بتایا کہ سی ڈی ایف کی قیادت میں افواجِ پاکستان اپنے فرائض بخوبی انجام دے رہی ہیں۔ انہوں نے کہا کہ پاکستان نے ہمیشہ امن کو فروغ دیا ہے، تاہم کسی نے بھی جارحیت کی کوشش کی تو اسے بھرپور جواب دیا جائے گا۔
وزیراعظم نے اس بات کا اعادہ کیا کہ پوری قوم افواجِ پاکستان کے شانہ بشانہ کھڑی ہے اور ملکی سالمیت پر کسی قسم کا سمجھوتہ نہیں ہوگا۔
