تہران (ویب ڈیسک) ایران جنگ کے 25 ویں روز پاسداران انقلاب نے آپریشن “وعدہ صادق چار” کے تحت حملوں کی 75 ویں لہر کا آغاز کر دیا ہے۔
ایرانی میڈیا کے مطابق پاسداران انقلاب نے اس لہر کا نام “یا فاطمہ الزھرہ” رکھا ہے اور اس میں صہیونی اور امریکی اہداف کو نشانہ بنایا گیا۔ پاسداران انقلاب کے بیان کے مطابق اس لہر میں اسرائیلی فوجیوں کے نئے ٹھکانے اور خفیہ مقامات ٹارگٹ کیے گئے جبکہ مختلف مقبوضہ علاقوں میں صہیونی فوجی پوزیشنز پر حملے کیے گئے۔
سعودی عرب کے شہر الخرج میں واقع پرنس سلطان ایئر بیس کو بھی نشانہ بنایا گیا، اور پاسداران انقلاب نے دعویٰ کیا کہ امریکی اڈے پر بھی بیلسٹک میزائلوں سے حملے کیے گئے۔
سپاہ پاسداران نے صہیونی اور امریکی افواج کو سخت وارننگ دیتے ہوئے کہا کہ تمام دشمن افواج ہماری انٹیلیجنس نگرانی میں ہیں اور شہری آبادیوں میں چھپنے والے دشمن بھی نہیں بچ سکیں گے۔
دوسری جانب ایرانی بیلسٹک میزائل کو روکنے کے بعد اس کا ملبہ وسطی اسرائیل میں 8 مقامات پر گرا، جس کے باعث کئی مقامات پر نقصان ہوا۔ ان حملوں کے بعد متعدد اسرائیلی شہروں میں سائرن بج اٹھے۔
