اسلام آباد (ویب ڈیسک) — عالمی مالیاتی فنڈ نے حکومتِ پاکستان کو پیٹرول پر عام سبسڈی دینے سے روک دیا ہے اور زور دیا ہے کہ سبسڈی صرف مخصوص غریب طبقے تک محدود رکھی جائے۔
ذرائع کے مطابق عالمی مالیاتی فنڈ کا مؤقف ہے کہ پیٹرولیم مصنوعات پر طویل عرصے تک سبسڈی جاری رکھنے سے ملکی معیشت پر منفی اثرات مرتب ہو سکتے ہیں۔ عالمی ادارے نے تجویز دی ہے کہ پیٹرول سستا کرنے کے بجائے بے نظیر انکم سپورٹ پروگرام کے تحت دی جانے والی امداد میں 5 ہزار روپے اضافہ کیا جائے۔
اطلاعات کے مطابق جنوری 2027 سے بے نظیر انکم سپورٹ پروگرام کے مستحقین کو 19 ہزار 500 روپے فراہم کیے جائیں گے، جبکہ وفاقی حکومت نے پروگرام کے فنڈز اور اعزازیے میں اضافے کی یقین دہانی کروا دی ہے۔
دوسری جانب حکومت نے مذاکرات کے بعد کھاد اور زرعی ادویات پر وفاقی محصول عائد کرنے کا معاملہ بھی فی الحال مؤخر کر دیا ہے۔
حکومت کا مؤقف ہے کہ براہِ راست نقد امداد کے ذریعے غریب طبقے کو مہنگائی کے اثرات سے زیادہ مؤثر انداز میں ریلیف دیا جا سکتا ہے۔
