کراچی/قصور
پاکستان کے محکمہ موسمیات (پی ایم ڈی) نے کراچی میں آئندہ 24 گھنٹوں کے دوران موسم گرم اور مرطوب رہنے کی پیش گوئی کی ہے، جبکہ شہر کے بعض علاقوں میں ہلکی بارش اور بوندا باندی کا امکان ظاہر کیا گیا ہے۔
محکمہ موسمیات کے مطابق کراچی میں مطلع جزوی طور پر ابر آلود رہے گا اور زیادہ سے زیادہ درجہ حرارت 34 سے 36 ڈگری سینٹی گریڈ کے درمیان رہنے کا امکان ہے۔ شہر میں کم سے کم درجہ حرارت 28 ڈگری سینٹی گریڈ ریکارڈ کیا گیا۔
پی ایم ڈی کے مطابق کراچی میں سمندری ہوائیں 7 کلومیٹر فی گھنٹہ کی رفتار سے چل رہی ہیں، جبکہ ہوا میں نمی کا تناسب 78 فیصد ریکارڈ کیا گیا ہے، جس کے باعث شہریوں کو گرمی اور حبس کی شدت محسوس ہو سکتی ہے۔
دوسری جانب قصور میں شدید بارش کے باعث افسوسناک حادثہ پیش آیا، جہاں ڈھنگ شاہ کے علاقے میں خستہ حال مکان کی چھت گرنے سے ایک بچے سمیت 2 افراد جاں بحق جبکہ 3 افراد زخمی ہوگئے۔
ریسکیو حکام کے مطابق جاں بحق افراد کی شناخت 10 سالہ صہیب اور 60 سالہ نذیر کے نام سے ہوئی ہے۔ حادثے میں 55 سالہ نذیراں بی بی، 40 سالہ فروا اور 3 سالہ پرویز زخمی ہوئے، جو چھت گرنے کے بعد ملبے تلے دب گئے تھے۔
ریسکیو ٹیموں نے موقع پر پہنچ کر امدادی کارروائی شروع کی، ملبہ ہٹا کر متاثرہ افراد کو نکالا اور زخمیوں کو طبی امداد کے لیے قریبی اسپتال منتقل کر دیا۔
