بھارت میں 65 سالہ شخص نے کمپیوٹر سائنس کی ڈگری کے بغیر چوری اور گمشدہ موبائل فونز کو ٹریک کرنے والی اینٹی تھیفٹ ایپلی کیشن تیار کرلی۔
بھارتی میڈیا کے مطابق ریاست بہار کے رہائشی روی نندن سہائے نے کئی ماہ تک کلاؤڈ ایپلی کیشن ڈویلپمنٹ سیکھنے کے بعد ”گیٹ یور لوسٹ فون“ کے نام سے اینٹی تھیفٹ ایپ تیار کی ہے۔
روی نندن سہائے کمپیوٹر سائنس کے گریجویٹ نہیں بلکہ شماریات میں پوسٹ گریجویٹ ہیں۔ ان کی تیار کردہ ایپ چوری یا گمشدہ فون کو تقریباً 20 میٹر کے دائرے میں تلاش کرنے میں مدد فراہم کرتی ہے۔
ایپ کیسے کام کرتی ہے؟
ایپ موبائل فون کے اسکرین پاس کوڈ کے ذریعے لاک ہونے کے بعد پسِ منظر میں کام کرتی ہے۔ اگر کوئی شخص غلط پاس کوڈ کے ذریعے فون کھولنے کی کوشش کرے تو ایپ فون کے فرنٹ کیمرے سے اس شخص کی تصویر حاصل کرلیتی ہے۔
اس کے بعد ایپ صارف کی جانب سے پہلے سے درج کیے گئے دو ہنگامی نمبرز اور ایک ای میل ایڈریس پر گھسنے والے شخص کی تصویر کے ساتھ فون کی GPS لوکیشن بھیج دیتی ہے۔
رپورٹ کے مطابق سہائے نے مختلف اے آئی ٹیکنالوجیز اور طریقوں پر تجربات کے بعد بالآخر کلاؤڈ بیسڈ سسٹم کے ذریعے ایپلی کیشن کا قابلِ استعمال ورژن تیار کیا۔
یہ ایپ چوری شدہ موبائل فونز کی تلاش کے ساتھ ساتھ ممکنہ چور کی شناخت میں بھی مدد فراہم کرنے کے لیے تیار کی گئی ہے
