نیوز ڈیسک
راولپنڈی: راولپنڈی شہر اور کینٹ کے متعدد علاقوں میں تعمیراتی کام کے باعث گیس کی فراہمی عارضی طور پر معطل کرنے کا اعلان کر دیا گیا ہے۔
سوئی ناردرن گیس کمپنی کے ترجمان کے مطابق پشاور روڈ انڈر پاس کے تعمیراتی منصوبے کے سلسلے میں مین گیس پائپ لائن پر ہک اپ کا کام کیا جائے گا، جس کے باعث مختلف علاقوں میں گیس کی فراہمی بند رہے گی۔
ترجمان نے بتایا کہ گیس کی فراہمی 17 اکتوبر کی رات ساڑھے 8 بجے سے 18 اکتوبر کی صبح 6 بجے تک معطل رہے گی۔
گیس کی بندش سے مری روڈ پر صدر سے فیض آباد تک دونوں اطراف کے علاقے متاثر ہوں گے، جبکہ پشاور روڈ پر گولڑہ موڑ سے صدر تک بھی گیس کی فراہمی معطل رہے گی۔
اسی طرح اڈیالہ روڈ، جی ٹی روڈ، قاسم مارکیٹ اور ویسٹریج سمیت متعدد علاقوں کے صارفین کو بھی گیس کی عارضی بندش کا سامنا کرنا پڑے گا۔
سوئی ناردرن گیس کمپنی نے متاثرہ علاقوں کے صارفین کو ہدایت کی ہے کہ وہ مقررہ وقت کے دوران گیس کی عدم دستیابی کے پیش نظر متبادل انتظامات کر لیں۔
ترجمان کے مطابق تعمیراتی کام مکمل ہونے کے بعد 18 اکتوبر کی صبح 6 بجے متاثرہ علاقوں میں گیس کی فراہمی بحال کر دی جائے گی۔
