نیوز ڈیسک
راولپنڈی: سری لنکا نے پاکستان کے خلاف تین میچوں کی ٹی ٹوئنٹی انٹرنیشنل سیریز کے دوسرے مقابلے میں ٹاس جیت کر پہلے فیلڈنگ کا فیصلہ کیا ہے۔ راولپنڈی کرکٹ اسٹیڈیم میں کھیلے جانے والے میچ میں مہمان ٹیم نے میزبان پاکستان کو پہلے بیٹنگ کی دعوت دی ہے۔
سری لنکن کپتان کوسل مینڈس نے ٹاس جیتنے کے بعد پہلے بولنگ کرنے کا انتخاب کیا، جبکہ پاکستانی کپتان صاحبزادہ فرحان نے پچ کی صورتحال پر اطمینان کا اظہار کیا۔ ان کا کہنا تھا کہ پہلے میچ کے مقابلے میں پچ زیادہ سخت اور اس پر گھاس کم دکھائی دے رہی ہے، جو پاکستان کی بیٹنگ کے لیے سازگار ثابت ہوسکتی ہے۔
پچ نمبر ایک پر یکساں باؤنس اور اچھی رفتار کی توقع ہے، جس کے باعث بلے بازوں کو رنز بنانے کے بہتر مواقع مل سکتے ہیں۔
دونوں ٹیموں نے دوسرے ٹی ٹوئنٹی کے لیے اپنی پلیئنگ الیون میں تبدیلیاں کی ہیں۔ سری لنکا نے تین کھلاڑیوں کو تبدیل کیا ہے، جبکہ پاکستان نے رضا اللہ کی جگہ سلمان مرزا کو ٹیم میں شامل کیا ہے۔
پاکستان کی پلیئنگ الیون
صاحبزادہ فرحان (کپتان)، فخر زمان، معاذ صداقت، حسن نواز، صائم ایوب، خواجہ نافع (وکٹ کیپر)، شاداب خان، محمد عمران، سلمان مرزا، نسیم شاہ اور ابرار احمد۔
سری لنکا کی پلیئنگ الیون
کوسل مینڈس (کپتان و وکٹ کیپر)، لہیرو اودارا، سینتھ جے وردنے، کامینڈو مینڈس، سہان اراچیگے، داسن شناکا، چمندو وکرما سنگھے، مہیش تھیکشنا، ایشان مالنگا، بنورا فرنینڈو اور نوان تھشارا۔
پاکستان نے سیریز کے پہلے میچ میں جمعہ، 9 اکتوبر کو سری لنکا کو چار وکٹوں سے شکست دے کر 0-1 کی برتری حاصل کی تھی۔ پہلے بیٹنگ کرتے ہوئے سری لنکا نے مقررہ 20 اوورز میں 8 وکٹوں کے نقصان پر 182 رنز بنائے تھے۔ جواب میں پاکستان نے چھ وکٹیں گنوا کر ہدف حاصل کرلیا، جبکہ نو گیندیں باقی تھیں۔
پہلے میچ میں صاحبزادہ فرحان اور معاذ صداقت نے ہدف کے تعاقب میں اہم کردار ادا کیا تھا۔
پاکستان کی کوشش ہوگی کہ دوسرا میچ جیت کر سیریز میں 0-2 کی فیصلہ کن برتری حاصل کرے، جبکہ سری لنکا کامیابی کے ساتھ سیریز برابر کرنے اور تیسرے میچ کو فیصلہ کن بنانے کے لیے میدان میں اترا ہے۔
