نیوز ڈیسک
اسلام آباد: وفاقی دارالحکومت کے علاقے بہارہ کہو میں چوری کی واردات کے دوران نامعلوم ملزمان شادی میں شرکت کے لیے جانے والے خاندان کے گھر کے تالے توڑ کر لاکھوں روپے کے طلائی زیورات، نقدی، موبائل فونز اور دیگر قیمتی سامان لے اڑے۔
پولیس کے مطابق، چوری ہونے والے سامان میں 20 تولے سے زائد سونے کے زیورات، نقدی، سات موبائل فونز اور دیگر قیمتی اشیا شامل ہیں۔ متاثرہ خاندان کا دعویٰ ہے کہ چوری شدہ سامان کی مجموعی مالیت ایک کروڑ روپے سے زیادہ ہے۔
واقعے کا مقدمہ تھانہ بہارہ کہو میں درج کر لیا گیا ہے، تاہم ملزمان کی گرفتاری اور چوری شدہ سامان کی برآمدگی کے حوالے سے مزید کارروائی جاری ہے۔
دوسری جانب، متاثرہ خاندان نے پولیس کی تفتیش میں مبینہ تاخیر پر تشویش کا اظہار کرتے ہوئے مطالبہ کیا ہے کہ واردات میں ملوث ملزمان کو فوری گرفتار کیا جائے اور چوری شدہ سامان کی برآمدگی کے لیے مؤثر اقدامات کیے جائیں۔
