انقرہ (ویب ڈیسک) — رجب طیب اردوان نے ایرانی حملوں کے تناظر میں ملک کی سلامتی کو یقینی بنانے کے لیے بڑے دفاعی اقدامات کی تصدیق کر دی ہے اور کہا ہے کہ ترکی اپنی سرحدوں اور قوم کے تحفظ کے لیے مکمل طور پر تیار ہے۔
غیر ملکی ذرائع ابلاغ کے مطابق انقرہ میں ترک فوجیوں کے اعزاز میں منعقدہ افطار ڈنر سے خطاب کرتے ہوئے ترک صدر نے کہا کہ خطے کی موجودہ صورتحال کے پیش نظر فوری اور ضروری اقدامات اٹھائے جا چکے ہیں۔
صدر اردوان نے انکشاف کیا کہ ایرانی حملوں کے جواب اور خطے کی صورتحال پر قابو پانے کے لیے نیٹو اتحادیوں کے ساتھ تفصیلی مشاورت کی گئی ہے، جس کے بعد دفاعی تیاریوں کو مزید مضبوط کیا گیا۔
انہوں نے سخت لہجہ اختیار کرتے ہوئے خبردار کیا کہ ایسے واقعات کو دوبارہ ہونے سے روکنے کے لیے واضح پیغام دیا جا رہا ہے اور ترکی کسی بھی خطرے سے نمٹنے کی مکمل صلاحیت رکھتا ہے۔
ترک صدر نے کہا کہ ملک اور قوم کی سلامتی ترک حکومت کی اولین ترجیح ہے اور اس معاملے پر کسی قسم کا سمجھوتہ نہیں کیا جائے گا۔
خطے میں بڑھتی کشیدگی کے باعث صورتحال پر عالمی سطح پر بھی گہری نظر رکھی جا رہی ہے
