واشنگٹن (ویب ڈیسک) — ڈونلڈ ٹرمپ نے کہا ہے کہ اگر امریکہ ایران پر بروقت حملہ نہ کرتا تو ایران کے پاس بہت جلد ایٹم بم آ جاتا۔ انہوں نے ایرانی قیادت کو براہِ راست نشانہ بناتے ہوئے کہا کہ اب ایران میں جو بھی لیڈر بننے کی خواہش کرے گا، اس کا انجام صرف موت ہے۔
صدر ٹرمپ نے واشنگٹن میں گول میز کانفرنس سے خطاب کرتے ہوئے ایران کے خلاف جاری فوجی کارروائیوں کو امریکی تاریخ کی بڑی کامیابی قرار دیا اور کہا کہ امریکہ اس وقت جنگی محاذ پر انتہائی مستحکم اور بہترین پوزیشن میں ہے۔
انہوں نے دعویٰ کیا کہ ایرانی قیادت تیزی سے ختم ہو رہی ہے اور ایران مکمل طور پر امریکی کنٹرول میں آ رہا ہے۔ ٹرمپ نے کہا کہ ایرانی میزائلوں اور لانچرز کو کامیابی سے تباہ کیا گیا کیونکہ ایران اپنے پڑوسیوں اور امریکی اتحادیوں کے لیے مسلسل خطرہ بن چکا تھا۔
صدر ٹرمپ نے سابق صدر اوباما کی پالیسیوں پر تنقید کرتے ہوئے کہا کہ نیوکلیئر ڈیل کے ذریعے ایران کو سب کچھ تھالی میں سجا کر دے دیا گیا، جو ایک بدترین ڈیل تھی۔ انہوں نے کہا کہ بروقت حملہ نہ کرنے کی صورت میں “پاگل لوگوں” کے پاس ایٹم بم ہونا پوری دنیا کے لیے تباہ کن ثابت ہو سکتا تھا۔
انہوں نے اپنی فوجی حکمت عملی پر تبصرہ کرتے ہوئے کہا: “مجھ سے پوچھا گیا کہ میں اپنی کارکردگی کو 10 میں سے کتنے نمبر دوں گا، تو میں نے کہا کہ میں خود کو 15 نمبر دوں گا۔”
صدر ٹرمپ نے مزید کہا کہ ایران کنٹرول سے باہر ہو رہا تھا، اس لیے امریکہ نے حملے سے پہلے ہی اس کو دفاعی پوزیشن پر دھکیل دیا تاکہ خطے اور عالمی سلامتی کو یقینی بنایا جا سکے۔
