وسکونسن: امریکا کی ریاست وسکونسن کے مختلف علاقوں میں شدید طوفان نے تباہی مچا دی، جس کے نتیجے میں درجنوں مکانات کو نقصان پہنچا، درخت جڑوں سے اکھڑ گئے جبکہ ہزاروں شہری بجلی کی سہولت سے محروم ہو گئے۔
حکام نے متاثرہ علاقوں میں ہنگامی حالت نافذ کر دی ہے، جبکہ ریسکیو اور بحالی کی ٹیموں نے امدادی سرگرمیاں شروع کر دی ہیں۔ حکام کے مطابق نقصان کا جائزہ لیا جا رہا ہے اور ترجیحی بنیادوں پر بجلی سمیت بنیادی سہولیات کی بحالی کے لیے اقدامات کیے جا رہے ہیں۔
شدید طوفان کے باعث کئی رہائشی علاقوں میں بڑے پیمانے پر نقصان ہوا، جس کے بعد متعدد خاندانوں کو اپنے گھروں سے محفوظ مقامات پر منتقل ہونا پڑا۔ متاثرین کی عارضی رہائش کے لیے ہنگامی پناہ گاہیں قائم کر دی گئی ہیں۔
ایمرجنسی حکام نے شہریوں کو احتیاطی تدابیر اختیار کرنے کی ہدایت کرتے ہوئے خبردار کیا ہے کہ وہ گری ہوئی بجلی کی تاروں، متاثرہ انفراسٹرکچر اور دیگر ممکنہ خطرات سے دور رہیں۔ شہریوں کو متاثرہ علاقوں میں جانے سے گریز کرنے اور غیر ضروری طور پر گھروں سے باہر نہ نکلنے کا مشورہ دیا گیا ہے۔
بجلی کی فراہمی بحال کرنے کے لیے امدادی ٹیمیں مسلسل کام کر رہی ہیں، جبکہ ریسکیو اہلکار طوفان سے سب سے زیادہ متاثرہ علاقوں میں امدادی کارروائیوں میں مصروف ہیں۔
حکام کا کہنا ہے کہ نقصان کی مکمل تفصیلات اور ممکنہ جانی نقصان سے متعلق معلومات مزید جائزے کے بعد جاری کی جائیں گی۔
