نیوز ڈیسک
اسلام آباد: محکمہ موسمیات نے آئندہ 24 گھنٹوں کے دوران اسلام آباد سمیت ملک کے مختلف علاقوں میں تیز ہواؤں، ژالہ باری اور موسلا دھار بارش کی پیش گوئی کرتے ہوئے شہری سیلاب اور لینڈ سلائیڈنگ کا خدشہ ظاہر کیا ہے۔
محکمہ موسمیات کے مطابق اسلام آباد، پنجاب، خیبرپختونخوا، گلگت بلتستان، آزاد کشمیر اور بلوچستان کے مختلف علاقوں میں تیز ہواؤں اور ژالہ باری کے ساتھ بارش متوقع ہے۔
شدید بارش کے باعث اسلام آباد، راولپنڈی، پشاور، مردان، صوابی، گوجرانوالہ، گجرات، سیالکوٹ، فیصل آباد اور لاہور کے نشیبی علاقوں میں اربن فلڈنگ کا خدشہ ہے۔
محکمہ موسمیات کے مطابق دیر، چترال، سوات، کوہستان، مری، گلیات، آزاد کشمیر اور ڈیرہ غازی خان کے ندی نالوں میں طغیانی آ سکتی ہے۔
اسی طرح سوات، مانسہرہ، ایبٹ آباد اور گلگت بلتستان کے پہاڑی علاقوں میں لینڈ سلائیڈنگ کا خطرہ بھی ظاہر کیا گیا ہے۔
ملک کے بیشتر میدانی علاقوں میں مطلع جزوی طور پر ابر آلود رہنے کا امکان ہے، جبکہ بعض مقامات پر شدید آندھی اور ژالہ باری بھی ہو سکتی ہے۔
محکمہ موسمیات نے خبردار کیا ہے کہ تیز ہوائیں اور ژالہ باری کمزور ڈھانچوں کو نقصان پہنچا سکتی ہے۔ متعلقہ اداروں اور شہریوں کو احتیاطی تدابیر اختیار کرنے اور ممکنہ خطرات سے نمٹنے کے لیے الرٹ رہنے کی ہدایت کی گئی ہے۔
