نیوز ڈیسک
واشنگٹن: امریکہ نے پہلی بار عوامی سطح پر تسلیم کیا ہے کہ اس نے زمین کے مدار میں ایک ہتھیار نصب کیا ہے، جسے خلا کے بڑھتے ہوئے عسکری استعمال کی جانب اہم پیش رفت قرار دیا جا رہا ہے۔
امریکی فضائیہ کے سیکرٹری ٹرائے مینک نے کہا ہے کہ واشنگٹن ابھرتے ہوئے خطرات سے نمٹنے کے لیے تیار ہے۔ ان کے مطابق مدار میں نصب کیا گیا یہ ہتھیار امریکی افواج کو ممکنہ مخالفانہ کارروائیوں سے تحفظ فراہم کرنے کے لیے ضروری تھا۔
تاہم، ٹرائے مینک نے ہتھیار کی نوعیت، صلاحیت یا آپریشنل تفصیلات کے بارے میں کوئی معلومات فراہم نہیں کیں اور یہ بھی نہیں بتایا کہ اسے کب زمین کے مدار میں پہنچایا گیا۔
امریکی اعلان پر چین نے تشویش کا اظہار کرتے ہوئے خلا میں ہتھیاروں کی تنصیب کی مخالفت کی ہے۔ بیجنگ نے واشنگٹن پر زور دیا ہے کہ وہ خلا میں اپنی عسکری صلاحیتوں اور موجودگی کو مزید وسعت دینے سے گریز کرے۔
چینی وزارت خارجہ کے ترجمان نے کہا کہ چین بیرونی خلا کے پرامن استعمال اور تحفظ کی حمایت کرتا ہے۔ انہوں نے امریکہ پر زور دیا کہ وہ خلائی میدان میں عسکری سرگرمیوں میں اضافے سے باز رہے۔
چین نے امریکہ سے عالمی اسٹریٹجک استحکام برقرار رکھنے اور خلا میں ہتھیاروں کی دوڑ روکنے کے لیے عملی اقدامات کرنے کا بھی مطالبہ کیا ہے۔
یہ پیش رفت ایسے وقت میں سامنے آئی ہے جب بڑی طاقتیں خلا میں اپنی عسکری اور تکنیکی صلاحیتوں کو مضبوط بنانے کے لیے ایک دوسرے سے آگے بڑھنے کی کوشش کر رہی ہیں، جس سے خلائی سلامتی اور عالمی اسٹریٹجک استحکام کے مستقبل سے متعلق خدشات میں اضافہ ہوا ہے۔
