نیوز ڈیسک
اسلام آباد: ڈپٹی انسپکٹر جنرل (ڈی آئی جی) پولیس اسلام آباد علی وسیم نے زیادتی کے جھوٹے مقدمات درج کرانے اور مبینہ طور پر رقم کے عوض ملزمان کے حق میں بیانات دینے والے افراد کے خلاف قانونی کارروائی کی ہدایت کردی ہے۔
پولیس حکام کے مطابق، انسدادِ زیادتی ایکٹ (Anti-Rape Act) کے تحت نشاندہی کیے گئے سات مقدمات میں مبینہ طور پر جھوٹی شکایات درج کرانے والے افراد اور گواہوں کے خلاف کارروائی شروع کی جائے گی۔
ڈی آئی جی علی وسیم نے کہا کہ ذاتی یا مالی مفادات کے لیے قانون کا غلط استعمال کرنے اور رقم کے عوض بیانات دے کر ملزمان کو مقدمات سے بری کرانے کی کوشش کرنے والوں کے خلاف قانون کے مطابق کارروائی کی جائے گی۔
انہوں نے کہا کہ ان اقدامات کا مقصد قانونی نظام کے غلط استعمال کی روک تھام اور نظامِ انصاف کو مزید مؤثر بنانا ہے۔
ڈی آئی جی کے مطابق، خواتین اور شہریوں کے حقوق کا تحفظ اور حقیقی متاثرین کو انصاف کی فراہمی اسلام آباد پولیس کی اولین ترجیحات میں شامل ہے۔
انہوں نے اس عزم کا اظہار کیا کہ قانون کو ذاتی یا مالی مفادات کے لیے استعمال کرنے کی اجازت نہیں دی جائے گی اور ایسے معاملات میں شواہد اور قانونی تقاضوں کے مطابق کارروائی عمل میں لائی جائے گی۔
