نیوز ڈیسک
راولپنڈی: پاکستان کے اوپننگ بیٹر صاحبزادہ فرحان نے سری لنکا کے خلاف تین میچوں کی ٹی 20 سیریز میں غیر معمولی کارکردگی کا مظاہرہ کرتے ہوئے بھارتی اوپنر ابھیشیک شرما کا ریکارڈ اپنے نام کرلیا۔ انہوں نے سیریز میں مجموعی طور پر 238 رنز بنا کر مکمل رکن ممالک کے درمیان تین میچوں کی دوطرفہ ٹی 20 سیریز میں سب سے زیادہ رنز بنانے والے بیٹر کا اعزاز حاصل کرلیا۔
صاحبزادہ فرحان نے سیریز کے تینوں میچوں میں نصف سنچریاں اسکور کیں اور 79.33 کی اوسط سے رنز بنائے۔ ان کا اسٹرائیک ریٹ 165.27 رہا، جب کہ مسلسل عمدہ بیٹنگ پر انہیں سیریز کا بہترین کھلاڑی بھی قرار دیا گیا۔
اس سے قبل یہ ریکارڈ بھارت کے ابھیشیک شرما کے پاس تھا، جنہوں نے رواں سال افغانستان کے خلاف تین میچوں کی ہوم ٹی 20 سیریز میں 229 رنز بنائے تھے۔ ان کی اننگز میں ایک سنچری اور ایک نصف سنچری شامل تھی، جب کہ بیٹنگ اوسط 76.33 رہی تھی۔
مکمل رکن ممالک کے درمیان تین میچوں کی دوطرفہ ٹی 20 سیریز میں سب سے زیادہ رنز بنانے والے بیٹرز کی فہرست میں صاحبزادہ فرحان 238 رنز کے ساتھ سرفہرست ہیں۔ ابھیشیک شرما 229 رنز کے ساتھ دوسرے، نیوزی لینڈ کے کولن منرو 223 رنز کے ساتھ تیسرے اور آسٹریلیا کے ڈیوڈ وارنر 217 رنز کے ساتھ چوتھے نمبر پر ہیں۔
صاحبزادہ فرحان نے پہلے میچ میں 53 گیندوں پر 89 رنز کی فیصلہ کن اننگز کھیلی، جس میں 10 چوکے اور 4 چھکے شامل تھے۔ ان کی جارحانہ بیٹنگ کی بدولت پاکستان نے 183 رنز کا ہدف 4 وکٹوں کے نقصان پر حاصل کیا۔
دوسرے ٹی 20 میچ میں بھی پاکستانی اوپنر نے اپنی فارم برقرار رکھتے ہوئے 44 گیندوں پر 73 رنز بنائے۔ پاکستان نے ان کی عمدہ کارکردگی کی مدد سے 3 وکٹوں پر 215 رنز اسکور کیے، جس کے جواب میں سری لنکن ٹیم 20 اوورز میں 7 وکٹوں کے نقصان پر 133 رنز ہی بنا سکی۔ اس فتح کے ساتھ پاکستان نے سیریز میں فیصلہ کن برتری حاصل کرلی۔
تیسرے اور آخری میچ میں صاحبزادہ فرحان نے 47 گیندوں پر 76 رنز اسکور کیے اور پاکستان کو 168 رنز تک پہنچانے میں اہم کردار ادا کیا۔ تاہم، سری لنکا نے ہدف 2 وکٹوں کے نقصان پر حاصل کرتے ہوئے میچ 8 وکٹوں سے جیت لیا۔
آخری میچ میں شکست کے باوجود پاکستان نے تین میچوں کی سیریز 2-1 سے اپنے نام کرلی۔ صاحبزادہ فرحان کی مسلسل تین نصف سنچریوں اور ریکارڈ ساز مجموعی اسکور نے انہیں سیریز کا نمایاں ترین کھلاڑی بنا دیا۔
