نیوز ڈیسک
راولپنڈی: راولپنڈی پولیس نے مختلف کارروائیوں کے دوران قتل اور اقدامِ قتل کے مقدمے میں 2015 سے مطلوب اشتہاری ملزم کو گرفتار کر لیا، جبکہ ڈکیتی اور موٹر سائیکل چوری کی وارداتوں میں مبینہ طور پر ملوث دو گینگز کے پانچ ارکان کو بھی حراست میں لے کر تین مسروقہ موٹر سائیکلیں اور نقدی برآمد کر لی۔ پولیس نے دیگر کارروائیوں میں پانچ افراد کو گرفتار کرکے شراب اور اسلحہ بمعہ ایمونیشن بھی برآمد کیا۔
قتل کے مقدمے میں 2015 سے مطلوب اشتہاری گرفتار
چکلالہ پولیس نے کارروائی کرتے ہوئے قتل اور اقدامِ قتل کے مقدمے میں مطلوب اشتہاری ملزم کو گرفتار کر لیا۔ پولیس کے مطابق، ملزم نے معمولی تلخ کلامی پر اپنے ساتھیوں کے ہمراہ فائرنگ کرکے ایک شہری کو قتل جبکہ دوسرے کو زخمی کر دیا تھا۔
پولیس نے ٹیکنیکل اور انسانی انٹیلی جنس ذرائع استعمال کرتے ہوئے ملزم کو گرفتار کیا۔ اس مقدمے میں ملزم کے دو ساتھیوں کو پہلے ہی گرفتار کیا جا چکا ہے۔
ایس پی پوٹھوہار چوہدری اثر علی نے کہا کہ گرفتار ملزم کو ٹھوس شواہد کے ساتھ چالان کرکے عدالت میں پیش کیا جائے گا۔
ملوث دو گینگز گرفتار
راولپنڈی پولیس نے ڈکیتی، موٹر سائیکل چوری اور دیگر وارداتوں میں مبینہ طور پر ملوث دو گینگز کے پانچ ملزمان کو گرفتار کر لیا۔ پولیس کے مطابق، گرفتار ملزمان کے قبضے سے تین مسروقہ موٹر سائیکلیں اور نقدی برآمد ہوئی۔
پیرودھائی پولیس نے تین رکنی گینگ کو گرفتار کرکے دو مسروقہ موٹر سائیکلیں اور رقم برآمد کی، جبکہ صادق آباد پولیس نے دو رکنی گینگ کے ارکان کو گرفتار کرکے ایک مسروقہ موٹر سائیکل برآمد کی۔
ایس پی راول بیدار بخت گوندل نے کہا کہ گرفتار ملزمان کو ٹھوس شواہد کے ساتھ چالان کرکے عدالت میں پیش کیا جائے گا۔
پانچ افراد گرفتار، شراب اور اسلحہ برآمد
راولپنڈی پولیس نے تھانہ مورگاہ اور نیوٹاؤن کے علاقوں میں کارروائیاں کرتے ہوئے پانچ افراد کو گرفتار کرکے مجموعی طور پر 35 لیٹر شراب اور اسلحہ بمعہ ایمونیشن برآمد کر لیا۔
ڈویژنل ایس پیز کے مطابق، منشیات اور غیر قانونی اسلحہ رکھنے والے افراد کے خلاف کارروائیاں جاری رہیں گی اور قانون کی خلاف ورزی کرنے والوں کے خلاف قانونی کارروائی عمل میں لائی جائے گی۔
