نیوزڈیسک
اسلام آباد: پاکستان تحریک انصاف کی سیاسی کمیٹی کے اجلاس کے بعد اعلامیہ جاری کر دیا گیا ہے۔
اعلامیے میں بتایا گیا کہ سیاسی معاملات پر مزید مشاورت اور فیصلوں کا اختیار سیاسی کمیٹی کے سپرد کیا گیا ہے۔
اعلامیے کے مطابق پارٹی نے توشہ خانہ ٹرائل کی اڈیالہ جیل میں روزانہ سماعت پر شدید تحفظات کا اظہار کیا ہے۔
اعلامیے میں کہا گیا ہے کہ روزانہ سماعت ملزمان کے بنیادی حقوق کو متاثر کرے گی اور انصاف کی فراہمی میں رکاوٹ ڈالے گی۔
اعلامیے میں مزید کہا گیا ہے کہ نو مئی کے مقدمات میں نااہلی پانے والے ارکان کو تحریک انصاف اب بھی اپنا حقیقی نمائندہ مانتی ہے، اسی لیے ان حلقوں میں ہونے والے ضمنی انتخابات کا بائیکاٹ کیا جائے گا۔ پارٹی نے ان ارکان کو ناحق سزائیں پانے پر خراجِ تحسین بھی پیش کیا۔
اجلاس میں فیصلہ کیا گیا کہ لاہور کے حلقہ این اے 129 میں انتخاب میں حصہ لیا جائے گا۔
یہ نشست میاں اظہر کے انتقال کے باعث خالی ہوئی تھی۔ اس نشست پر امیدوار کھڑا کرنے کا فیصلہ کیا گیا ہے۔
اعلامیے کے مطابق بانی پی ٹی آئی کی ہدایت پر قومی اسمبلی کی پبلک اکاؤنٹس کمیٹی سے استعفیٰ دینے کا اعلان کیا گیا ہے، جبکہ اسٹینڈنگ کمیٹیوں کی چیئرمین شپ اور رکنیت سے بھی فوری استعفے دینے کی ہدایت دی گئی ہے۔
