نیوزڈیسک
اسلام آباد: دنیا کی دو بڑی معیشتیں، امریکا اور چین، ایک بار پھر تجارتی تنازع کا شکار ہو رہی ہیں۔
امریکی صدر ڈونلڈ ٹرمپ نے بیجنگ کو خبردار کیا ہے کہ اگر چین نے نایاب معدنیات سے تیار کیے جانے والے میگنیٹس کی برآمد روکنے کی کوشش کی تو امریکا دو سو فیصد تک درآمدی ٹیرف عائد کرنے پر مجبور ہو جائے گا۔
وائٹ ہاؤس میں جنوبی کوریا کے صدر لی جے میونگ سے ملاقات کے بعد صحافیوں سے گفتگو کرتے ہوئے ٹرمپ نے کہا کہ چین کو ہمیں میگنیٹس دینا ہوں گے، اگر وہ نہیں دیتے تو ہمیں ان پر دو سو فیصد ٹیرف لگانا پڑے گا۔ تاہم مجھے نہیں لگتا کہ ایسا کوئی مسئلہ پیدا ہوگا۔
ٹرمپ نے ایک طرف بیجنگ کے ساتھ بہتر تعلقات کی امید ظاہر کرتے ہوئے کہا کہ ممکن ہے وہ رواں سال یا اس کے فوراً بعد چین کا دورہ کریں، جبکہ دوسری جانب بیجنگ کو سخت وارننگ بھی دے ڈالی۔
ان کے مطابق چین کے پاس کچھ کارڈز ہیں لیکن ہمارے پاس ناقابلِ یقین کارڈز ہیں۔ اگر ہم نے وہ کھیلے تو چین کو تباہ کر دیں گے، مگر میری خواہش ہے کہ یہ نوبت نہ آئے۔
غیر ملکی میڈیا کے مطابق، اس تنازع کی جڑ نایاب معدنیات ہیں جن کا استعمال موبائل فونز سے لے کر جنگی طیاروں تک وسیع پیمانے پر ہوتا ہے۔
دنیا بھر میں ان معدنیات کی سب سے زیادہ پیداوار چین میں ہوتی ہے، یہی وجہ ہے کہ واشنگٹن اسے اپنی اسٹریٹجک کمزوری تصور کرتا ہے۔
