نیوزڈیسک
راولپنڈی: پاکستان تحریک انصاف کے بانی عمران خان کے مطالعہ کے لیے کتابیں اڈیالہ جیل پہنچا دی گئیں۔
جیو نیوز کے مطابق یہ کتابیں عمران خان کے وکیل بیرسٹر سلمان صفدر کے ذریعے جیل انتظامیہ کو فراہم کی گئیں۔
ادھر، عمران خان اور بشریٰ بی بی کے خلاف توشہ خانہ ٹو کیس میں اہم پیش رفت سامنے آئی ہے۔
گزشتہ جیل سماعت کا تحریری حکم نامہ اسپیشل جج سینٹرل شاہ رخ ارجمند نے جاری کر دیا۔
حکم نامے میں کہا گیا کہ جن وکلا کے وکالت نامے جمع ہیں، سپرنٹنڈنٹ جیل انہیں داخلے کی اجازت دیں، جبکہ جیل کے باہر موجود فیملی ممبران کو بھی سماعت میں شریک ہونے دیا جائے۔
یہ حکم بیرسٹر سلمان صفدر کی درخواست پر جاری کیا گیا، جنہوں نے جیل سماعت میں وکلا اور اہلِ خانہ کو روکنے کے اقدام کو چیلنج کیا تھا۔ عدالت نے سپرنٹنڈنٹ جیل کو ہدایات دینے کے بعد درخواست نمٹا دی۔
