نیوزڈیسک
کراچی: مرکزی رویتِ ہلال کمیٹی نے اعلان کیا ہے کہ پاکستان میں ربیع الاول 1447 ہجری کا چاند نظر نہیں آیا۔
اجلاس کمیٹی کے چیئرمین مولانا سید محمد عبدالخبیر آزاد کی زیر صدارت کراچی میں منعقد ہوا، جس میں وزارتِ مذہبی امور، محکمہ موسمیات، اسپارکو، وزارت سائنس اینڈ ٹیکنالوجی کے نمائندوں کے ساتھ ساتھ کمیٹی کے اراکین نے شرکت کی۔
اس موقع پر اسلام آباد، لاہور، پشاور اور کوئٹہ سمیت دیگر شہروں میں زونل رویت ہلال کمیٹیوں کے اجلاس بھی منعقد ہوئے۔
ملک کے کسی حصے سے چاند کی رویت کی شہادت موصول نہ ہونے پر متفقہ طور پر فیصلہ کیا گیا کہ پاکستان میں یکم ربیع الاول منگل چھببیس اگست کو ہوگی، جبکہ 12 ربیع الاول (عید میلاد النبی ﷺ) ہفتہ چھ ستمبر کو مذہبی عقیدت و احترام کے ساتھ منائی جائے گی۔
محکمہ موسمیات کے مطابق چاند کی عمر تقریباً بتیس گھنٹے تھی اور وہ شام سات بج کر تین منٹ سے سات بج کر چوالیس منٹ تک دکھائی دے سکتا تھا، تاہم ملک کے مختلف حصوں میں بارش اور ابر آلود موسم کے باعث رویت کے امکانات پہلے ہی کم تھے۔
