آیت اللہ خامنہ ای کی شہادت پر احتجاج کی کال، اسلام آباد ٹریفک پولیس کی شہریوں کے لیے ایڈوائزری جاری

اسلام آباد ٹریفک پولیس نے آیت اللہ خامنہ ای کی شہادت پر احتجاج کی کال کے پیش نظر شہریوں کے لیے ٹریفک ایڈوائزری جاری کر دی ہے۔

تفصیلات کے مطابق اسلام آباد ٹریفک پولیس نے 6 مارچ 2026 کے لیے شہر کے مختلف حصوں، خصوصاً ریڈ زون اور اس سے ملحقہ علاقوں میں ٹریفک کی روانی برقرار رکھنے کے لیے خصوصی انتظامات کیے ہیں۔

ترجمان ٹریفک پولیس کے مطابق شہریوں کی سہولت اور امن و امان کی صورتحال کے پیش نظر متعدد متبادل راستوں کا تعین کیا گیا ہے۔

ترجمان کا کہنا تھا کہ ریڈ زون کی طرف جانے والے تمام عمومی داخلی راستے بند رہیں گے، تاہم ریڈ زون میں داخلے کے لیے مارگلہ روڈ اور ہوٹل کے قریب موجود راستے کھلے رکھے گئے ہیں۔

اسی طرح کلثوم پلازہ سے چائنہ چوک کی جانب جانے والی سڑک ٹریفک کے لیے مکمل بند رہے گی جبکہ شہری متبادل کے طور پر جناح ایونیو استعمال کر سکتے ہیں۔

پولی کلینک سے لال کوارٹر چوک (لقمان حکیم روڈ) تک ٹریفک کے لیے ڈائیورشن رکھی گئی ہے اور اس علاقے کے مسافروں کو صدر روڈ استعمال کرنے کی ہدایت کی گئی ہے۔

اس کے علاوہ کلب روڈ سے آنے والی ٹریفک کو کشمیر چوک سے سری نگر ہائی وے کی جانب موڑا جائے گا، جہاں سے گاڑیاں سیونتھ ایونیو یا مارگلہ روڈ کے ذریعے اپنی منزل تک پہنچ سکیں گی۔

اسلام آباد ٹریفک پولیس کے ترجمان نے شہریوں سے اپیل کی ہے کہ وہ کسی بھی پریشانی سے بچنے کے لیے سفر شروع کرنے سے پہلے متبادل راستوں کا انتخاب کریں اور ٹریفک اہلکاروں کے ساتھ تعاون کریں۔