دفاتر اور تعلیمی اداروں کے ورکنگ دن کم کرنے کا منصوبہ تیار، ورک فرام ہوم اور آن لائن تعلیم پر غور
وزیراعظم شہباز شریف کی زیر صدارت پیٹرولیم مصنوعات کے اسٹاک اور کھپت سے متعلق ہائی پاورڈ کمیٹی کا اہم اجلاس منعقد ہوا، جس میں توانائی کے بہتر استعمال اور ایندھن کی بچت کے لیے متعدد تجاویز پر غور کیا گیا۔اجلاس میں وزیر خزانہ محمد اورنگزیب نے وزیراعظم کو بریفنگ دیتے ہوئے بتایا کہ دفاتر، تعلیمی اداروں اور خدمات فراہم کرنے والے شعبوں کے لیے ورکنگ دنوں میں کمی کا منصوبہ تیار کر لیا گیا ہے۔بریفنگ کے مطابق تعلیمی اداروں میں ورچوئل نظام تعلیم متعارف کرانے جبکہ سرکاری اور نجی دفاتر کے لیے ورک فرام ہوم پالیسی پر بھی غور کیا گیا ہے، تاکہ ایندھن کے استعمال میں کمی لائی جا سکے۔حکام کے مطابق ان اقدامات کے نتیجے میں پیٹرولیم مصنوعات کے اسٹاک کا مؤثر استعمال ممکن ہوگا اور ملک میں ایندھن کی طلب کم کرنے میں مدد ملے گی۔اجلاس میں یہ بھی تجویز دی گئی کہ پیٹرولیم مصنوعات کی قیمتوں میں رد و بدل ہفتہ وار بنیادوں پر کیا جائے جبکہ ذخیرہ اندوزی اور اسمگلنگ کی روک تھام کے لیے سخت کریک ڈاؤن کیا جائے۔ذرائع کے مطابق وزیراعظم شہباز شریف آج اس حوالے سے اہم فیصلوں کا اعلان کر سکتے ہیں۔
