اسلام آباد (ویب ڈیسک) – پیٹرولیم مصنوعات کی قیمتوں میں حالیہ اضافے پر مختلف سیاسی رہنماؤں نے حکومت کو شدید تنقید کا نشانہ بنایا ہے اور اس فیصلے کو عوام کے لیے بڑا بوجھ قرار دیا ہے۔
تفصیلات کے مطابق سابق وفاقی وزیر فواد چوہدری نے اپنے بیان میں کہا کہ حکومت اس وقت پیٹرولیم مصنوعات پر فی لیٹر تقریباً سو روپے ٹیکس وصول کر رہی ہے۔ ان کے مطابق حکومت کو ٹیکس کم کر کے عوام کو ریلیف دینا چاہیے تھا، مگر اس کے برعکس پیٹرول کی قیمتوں میں غیر حقیقی اضافہ کر دیا گیا جو درمیانے طبقے کے لیے تباہ کن ثابت ہوگا۔
اسی طرح سید عمران شفقت نے کہا کہ پیٹرولیم مصنوعات میں ایک ساتھ 55 روپے فی لیٹر اضافہ ظلم کے مترادف ہے۔ انہوں نے دعویٰ کیا کہ حکومت عالمی حالات کو جواز بنا رہی ہے جبکہ حقیقت یہ ہے کہ نئی عالمی قیمتوں پر ابھی تک پیٹرول خریدا ہی نہیں گیا۔
امیر جماعت اسلامی سراج الحق نے بھی حکومت پر تنقید کرتے ہوئے کہا کہ پیٹرول کی قیمتیں بڑھانے کے بجائے حکومت کو اپنی عیاشیوں اور غیر ترقیاتی اخراجات میں کمی کرنی چاہیے تاکہ مہنگائی سے پریشان عوام کو کچھ ریلیف مل سکے۔
دوسری جانب رہنما ندیم افضل چن نے بھی سوال اٹھایا کہ جنگ ہو، وبا ہو یا دیگر مشکل حالات، ہمیشہ عوام ہی قربانیاں دیتے ہیں جبکہ اشرافیہ کی مراعات میں کمی نظر نہیں آتی۔
سیاسی رہنماؤں کے ان بیانات کے بعد پیٹرولیم مصنوعات کی قیمتوں میں اضافے کا معاملہ سیاسی حلقوں میں بحث کا موضوع بن گیا ہے۔
