پیٹرولیم مصنوعات کی ذخیرہ اندوزی پر کریک ڈاؤن کی ہدایت، وزیراعظم شہباز شریف

اسلام آباد (ویب ڈیسک) – وزیراعظم محمد شہباز شریف نے صوبائی حکومتوں کو پیٹرولیم مصنوعات کے ذخیرہ اندوزوں کے خلاف سخت قانونی کارروائی کی ہدایت جاری کر دی ہے۔

وزیراعظم محمد شہباز شریف کی زیر صدارت پیٹرولیم مصنوعات سے متعلق اعلیٰ سطح اجلاس جمعہ کو یہاں منعقد ہوا۔ وزیر اعظم آفس کے ذرائع ابلاغ شعبے کی جانب سے جاری بیان کے مطابق اجلاس میں نائب وزیراعظم و وزیر خارجہ محمد اسحاق ڈار، وفاقی وزیر جام کمال خان اور اعلیٰ سرکاری حکام نے شرکت کی۔

وزارت پیٹرولیم نے اجلاس کو خطے کی بدلتی صورتحال کے تناظر میں پیٹرولیم مصنوعات کے ذخائر کے بارے میں تفصیلی بریفنگ دی جس میں بتایا گیا کہ ملکی ضروریات کو پورا کرنے کے لیے ملک میں پیٹرولیم مصنوعات کا مناسب ذخیرہ موجود ہے۔

وزیراعظم نے صوبائی حکومتوں کو ہدایت کی کہ پیٹرولیم مصنوعات کے ذخیرہ اندوزوں کے خلاف سخت قانونی کارروائی کی جائے۔ جو پیٹرول پمپ مصنوعی قلت پیدا کرنے کے اس مکروہ دھندے میں ملوث ہو اسے فوری طور پر بند کیا جائے اور اس کا لائسنس منسوخ کر کے قانونی کارروائی کی جائے۔

وزیراعظم نے وزیر پیٹرولیم کو ہدایت کی کہ وہ صوبوں کا دورہ کریں اور صوبائی حکومتوں کے ساتھ مل کر پیٹرولیم مصنوعات کی بچت اور عوام کو ان کی بلا تعطل فراہمی کے حوالے سے لائحہ عمل اور منصوبہ بندی تیار کریں۔

وزیراعظم نے پیٹرولیم مصنوعات کی نقل و حرکت سے متعلق نگرانی نظام بنانے کی بھی ہدایت دی جس کے ذریعے صوبوں کے ساتھ فوری بنیادوں پر معلومات شیئر کی جا سکیں اور پیٹرولیم مصنوعات کی ترسیل کی نگرانی کی جا سکے۔