کراچی (ویب ڈیسک) – پیٹرول اور ڈیزل کی قیمتوں میں اضافے کے باعث جامعہ کراچی نے صبح کی کلاسز کو آن لائن کرنے کا فیصلہ کیا ہے۔ یونیورسٹی انتظامیہ کے مطابق 9 مارچ سے رمضان کے اختتام تک صبح کی تمام کلاسز آن لائن ہوں گی۔
وائس چانسلر پروفیسر ڈاکٹر خالد عراقی کی منظوری سے جاری نوٹیفکیشن میں کہا گیا ہے کہ طلبہ کی سہولت کے پیش نظر یہ اقدام اٹھایا گیا ہے تاکہ ٹرانسپورٹ کے مسائل کم سے کم ہوں۔
اسی دوران، یونیورسٹی انتظامیہ نے پیٹرول کے استحقاق والے کوٹے میں 25 فیصد کمی کا بھی اعلان کیا ہے۔ رجسٹرار جامعہ کراچی کے نوٹیفکیشن کے مطابق منظور شدہ گاڑیوں اور مختلف افراد کے پیٹرول کی حد میں کمی کر دی گئی ہے۔
وائس چانسلر نے کہا کہ ایندھن کی بڑھتی ہوئی قیمتوں سے قبل جامعہ کراچی کی بسوں میں روزانہ ساڑھے 3 لاکھ روپے کے پیٹرول استعمال ہوتے تھے، اور ملازمین و افسران ماہانہ 28 ہزار لیٹر پیٹرول خرچ کرتے تھے۔ موجودہ اقدامات سے پیٹرول کے بجٹ میں خاطرخواہ کمی آئے گی، اور ملازمین کے لیے بھی متبادل طور پر ورک فرام ہوم پر غور کیا جا رہا ہے۔
واضح رہے کہ حکومت نے حال ہی میں پٹرول اور ڈیزل 55 روپے فی لیٹر مہنگا کر دیا ہے۔ نئی قیمتوں کے مطابق ایک لیٹر پٹرول 321 روپے 17 پیسے اور ایک لیٹر ڈیزل 335 روپے 86 پیسے ہو گیا ہے۔ مٹی کا تیل 130 روپے 8 پیسے مہنگا ہو کر 318 روپے 81 پیسے فی لیٹر ہو گیا ہے۔
وزیر پٹرولیم نے کہا ہے کہ صورتحال بہتر ہوتے ہی قیمتیں کم کی جائیں گی اور توانائی کی ضروریات پوری کرنے کی کوششیں جاری ہیں، تاہم موجودہ بحران سے کب اور کیسے نکلیں گے اس کا تعین مشکل ہے۔
ادھر کراچی میں بسوں اور منی بسوں کے کرایوں میں 10 سے 20 فیصد اضافہ کر دیا گیا ہے جبکہ اندرون ملک جانے والی بسوں کے کرائے بھی بڑھا دیے گئے ہیں۔
