واشنگٹن/تہران (ویب ڈیسک) – امریکی وزیرِ خزانہ اسکاٹ بیسنٹ نے خبردار کیا ہے کہ ایران پر آج رات اب تک کی سب سے بڑی بمباری کی جائے گی۔
تفصیلات کے مطابق مشرقِ وسطیٰ میں جاری ایک ہفتہ طویل جنگ نے خطرناک رخ اختیار کر لیا ہے، اور اسرائیل نے تہران پر حملوں کی نئی اور وسیع لہر شروع کر دی ہے۔
اسکاٹ بیسنٹ نے ایک ٹی وی انٹرویو میں کہا کہ اس جنگ کی “سب سے بڑی بمباری” ابھی باقی ہے، جس کا مقصد ایران کی فوجی صلاحیتوں، قیادت اور جوہری پروگرام کو مکمل طور پر ختم کرنا ہے۔ انہوں نے مزید بتایا کہ اس حملے کا ہدف ایران کے میزائل لانچرز اور میزائل بنانے والی فیکٹریاں ہوں گی تاکہ اس کی صلاحیتوں کو کمزور کیا جا سکے۔
امریکی وزیرِ خزانہ نے کہا کہ ایران آبنائے ہرمز پر کنٹرول کے ذریعے عالمی معاشی افراتفری پھیلانا چاہتا ہے۔
ہفتے کی علی الصبح تہران کے مغربی علاقوں میں شدید دھماکے ہوئے، اور آسمان دھوئیں کے بادلوں سے ڈھک گیا۔ ایران کی جانب سے اسرائیل پر میزائلوں کی برسات کے بعد مقبوضہ بیت المقدس سمیت پورے اسرائیل میں سائرن بج اٹھے اور شہری پناہ گاہوں میں محصور ہو گئے۔
