اِسلام اباد:پاکستان کے سینئر اداکار محمود اسلم نے اپنی محبت کی شادی سے متعلق دلچسپ کہانی سناتے ہوئے کہا کہ ایک مزاحیہ جملے کی وجہ سے وہ حقیقت میں سہگل خاندان کے داماد بن گئے۔
محمود اسلم نے یہ بات حال ہی میں جیو ٹی وی کے مزاحیہ شو ہنسنا منع ہے میں میزبان تابش ہاشمی کے ساتھ گفتگو کے دوران بتائی۔ اداکار نے کہا کہ جوانی میں وہ اوپن ایئر تھیٹر میں ہیرو کا کردار ادا کر رہے تھے، اور ایک موقع پر معروف کامیڈین امان اللہ نے مذاق میں کہا کہ “اتنا غرور کیوں ہے، جیسے تم سہگل خاندان کے داماد ہو”، اور بعد میں حقیقی زندگی میں ایسا ہی ہوا۔
اداکار نے بتایا کہ گریجویشن کے بعد وہ فارغ تھے اور ایک دوست نے نوکری دلانے کا وعدہ کیا، اسی دوران ان کی ملاقات سیاستدان زاہد حامد سے ہوئی، جنہوں نے انہیں سیلز مین کی ملازمت کرنے سے روکا اور ایک نئے آئس کریم پارلر میں مینیجر کے طور پر کام دیا۔
محمود اسلم کے مطابق ان کی اہلیہ، جنہیں وہ اس وقت نہیں جانتے تھے، اکثر اس آئس کریم پارلر آتی رہیں اور مذاق میں کہتی تھیں کہ وہ آئس کریم کے لیے نہیں بلکہ مینیجر کو دیکھنے آتی ہیں۔ ان کے ساتھ آنے والی دوستیں بھی انہیں دیکھنے آتی تھیں کیونکہ اس وقت محمود اسلم کا ایک ڈرامہ کافی مقبول ہو چکا تھا۔
اداکار نے ہنستے ہوئے کہا کہ ان کی اہلیہ اکثر اپنی دوستوں کو انہیں فون کر کے اظہارِ پسندیدگی کرنے کو کہتی تھیں، مگر وہ ہمت نہ کر پاتیں۔ آخرکار، ان کی اہلیہ خود محمود اسلم سے ملنے آئیں اور اسی ملاقات کے بعد دونوں کے درمیان محبت بڑھ گئی۔
محمود اسلم کے مطابق اس ملاقات کے بعد انہوں نے اپنی محبوبہ کو جانے نہیں دیا اور یوں ان کی محبت شادی میں بدل گئی۔
