وفاقی تحقیقاتی ادارہ (ایف آئی اے) نے کراچی کے علاقے صدر میں اہم کارروائی کرتے ہوئے انسانی اسمگلنگ کی کوشش ناکام بنا دی اور 33 خواتین کو بازیاب کرا لیا، جبکہ ایک خاتون سمیت 4 ملزمان کو گرفتار کر لیا گیا۔حکام کے مطابق ایف آئی اے کے انسدادِ انسانی اسمگلنگ سرکل نے پاسپورٹ آفس صدر کے قریب واقع دو ہوٹلوں پر چھاپے مارے، جہاں خواتین کو بیرونِ ملک روانگی سے قبل رکھا گیا تھا۔کارروائی کے دوران خواتین کو مشتبہ ایجنٹوں اور اسمگلروں کے ساتھ تحویل میں لے لیا گیا۔ملزمان کے قبضے سے 29 پاسپورٹس اور دیگر اہم دستاویزات بھی برآمد ہوئیں۔ ابتدائی تحقیقات کے مطابق ان خواتین کومتحدہعرب امارات وزٹ ویزوں پر بھیجنے کی تیاری کی جا رہی تھی، تاہم حکام کا کہنا ہے کہ انہیں جسم فروشی اور جنسی استحصال کے لیے استعمال کیا جانا تھا۔ایف آئی اے نے بتایا کہ گرفتار افراد کے خلاف پریوینشن آف ٹریفکنگ اِن پرسنز ایکٹ 2018 کے تحت تین مقدمات درج کر لیے گئے ہیں۔حکام کے مطابق اس منظم نیٹ ورک کے دیگر سہولت کاروں اور مرکزی کرداروں کو بے نقاب کرنے کے لیے تحقیقات کا دائرہ وسیع کر دیا گیا ہے، اور مزید گرفتاریوں کا بھی امکان ہے۔
