برن/برگن اسٹاک: اسلام آباد کی مفاہمت کی یادداشت پر دستخط کے بعد امریکہ اور ایران کے درمیان تکنیکی مذاکرات آج (جمعہ) سے سوئٹزرلینڈ کے سیاحتی مقام برگن اسٹاک میں شروع ہو رہے ہیں۔
سوئس وزارت خارجہ کے مطابق دونوں ممالک کے نمائندے معاہدے پر عملدرآمد کے طریقہ کار اور آئندہ سفارتی اقدامات کے فریم ورک پر بات چیت کریں گے۔
مذاکرات میں پاکستان اور قطر کے نمائندوں کی شرکت بھی متوقع ہے، جنہوں نے اس عمل میں ثالثی کا کردار ادا کیا تھا۔
دوسری جانب امریکی نائب صدر جے ڈی وینس کا سوئٹزرلینڈ کا مجوزہ دورہ منسوخ کر دیا گیا ہے۔ وائٹ ہاؤس کے ترجمان کے مطابق ایران کے ساتھ مذاکرات کے شیڈول اور انتظامات کو ابھی حتمی شکل نہیں دی گئی، تاہم امریکی وفد صورتحال واضح ہونے پر روانگی کے لیے تیار ہے۔
وائٹ ہاؤس پریس پول کو دیے گئے بیان میں ترجمان نے کہا کہ مذاکرات کی لاجسٹکس ہمیشہ پیچیدہ ہوتی ہے اور اس بار بھی شیڈول میں تبدیلیاں ممکن ہیں۔ ان کے مطابق نائب صدر پہلے سے طے شدہ پروگرام کے مطابق سفر نہیں کریں گے، جبکہ پیش رفت کی صورت میں مزید تفصیلات فراہم کی جائیں گی۔
وائٹ ہاؤس نے اس عزم کا اعادہ کیا ہے کہ امریکہ جلد از جلد ایران کے ساتھ تکنیکی مذاکرات کا آغاز چاہتا ہے۔
واضح رہے کہ اس ہفتے دستخط شدہ مفاہمت کی یادداشت کے تحت دونوں ممالک نے ایران کے جوہری پروگرام سے متعلق امور پر 60 روزہ تکنیکی مذاکرات پر اتفاق کیا ہے۔
اس سے قبل نائب صدر وینس نے کہا تھا کہ بات چیت ہفتے کے اختتام تک شروع ہونے کی توقع ہے اور وہ اس مقصد کے لیے سوئٹزرلینڈ جانے کا ارادہ رکھتے ہیں، تاہم انہوں نے یہ بھی واضح کیا تھا کہ صورتحال کسی بھی وقت تبدیل ہو سکتی ہے۔
سوئس حکومت نے مذاکرات کے حوالے سے مزید تفصیلات جاری نہیں کیں جبکہ تازہ ترین سرکاری بیان میں شریک ممالک سے متعلق سابقہ حوالہ بھی حذف کر دیا گیا ہے۔
