پشاور: حکومتِ خیبر پختونخوا نے آئندہ مالی سال کے بجٹ کی بروقت تیاری کے لیے اہم انتظامی اقدامات اٹھاتے ہوئے جمعہ کے روز ‘ورک فرام ہوم’ کی سہولت ختم کر دی ہے اور اسے باقاعدہ ورکنگ ڈے قرار دے دیا ہے۔
محکمہ خزانہ کی جانب سے جاری نوٹیفکیشن کے مطابق بجٹ تیاری کے حساس مرحلے اور بڑھتے ہوئے کام کے پیشِ نظر افسران اور ملازمین کی مکمل حاضری یقینی بنانے کے لیے یہ فیصلہ کیا گیا ہے۔
نوٹیفکیشن میں کہا گیا ہے کہ بجٹ سے متعلق امور میں تاخیر سے بچنے کے لیے اب جمعہ کو بھی دیگر دنوں کی طرح کام جاری رکھا جائے گا۔ مزید برآں، محکمہ خزانہ کے افسران کو بغیر اجازت شہر چھوڑنے سے روک دیا گیا ہے۔
حکام کے مطابق اگر کوئی افسر چھٹی پر بھی ہو تو اسے ہنگامی بنیادوں پر طلب کیے جانے پر دستیاب ہونا ہوگا اور فوری طور پر دفتر پہنچنا ہوگا۔
محکمہ خزانہ نے تمام متعلقہ افسران کو ہدایت کی ہے کہ وہ بجٹ کی تیاری کے دوران ہر وقت دستیاب رہیں تاکہ عمل کو تیز، شفاف اور غلطیوں سے پاک بنایا جا سکے۔
حکام کا کہنا ہے کہ ان اقدامات کا مقصد بجٹ کو مقررہ وقت پر مکمل کر کے تمام قانونی تقاضے پورے کرنا ہے، جس کے لیے اضافی اوقات کار بھی متعارف کرائے جا رہے ہیں۔
