کراچی: شہر میں اغوا برائے تاوان کی وارداتوں میں پولیس اہلکاروں کے ملوث ہونے کا ایک اور سنگین واقعہ سامنے آیا ہے، جہاں اینٹی وائلنٹ کرائم سیل نے کارروائی کرتے ہوئے پولیس افسر اور اہلکار سمیت 4 ملزمان کو گرفتار کر لیا۔ذرائع کے مطابق ملزمان نے گلستانِ جوہر کے علاقے سے 60 سالہ شہری مرزا یوسف بیگ کو اغوا کیا۔ واردات میں بہادر آباد تھانے کا اے ایس آئی محسن آصف اور فارن سیکیورٹی سیل کا اہلکار راشد علی بھی شامل تھے، جبکہ دیگر ملزمان میں حماد نامی شخص اور اس کے ساتھی شامل ہیں۔اے وی سی سی حکام کے مطابق 7 ملزمان پولیس پارٹی کے روپ میں شہری کے گھر میں داخل ہوئے، جہاں سے انہوں نے مرزا یوسف بیگ کو اغوا کرنے کے ساتھ 35 لاکھ روپے نقد بھی لوٹ لیے۔ بعد ازاں مغوی کو نامعلوم مقام پر منتقل کر کے 5 کروڑ روپے تاوان طلب کیا گیا، جو بعد میں 25 لاکھ روپے میں طے پایا۔تاوان کی رقم ملینیئم مال کے قریب راشد منہاس روڈ پر ادا کی گئی، جہاں اے وی سی سی ٹیم نے کارروائی کرتے ہوئے 4 ملزمان کو گرفتار کر لیا، جبکہ 3 ملزمان فرار ہونے میں کامیاب ہو گئے۔پولیس کے مطابق واردات میں استعمال ہونے والی گاڑی بھی برآمد کر لی گئی ہے، جبکہ مفرور ملزمان کی گرفتاری کے لیے چھاپے مارے جا رہے ہیں۔
