پنجاب اور کراچی میں پولیس اور سی ٹی ڈی کی کارروائیوں کے دوران تین مختلف مبینہ مقابلوں میں مجموعی طور پر 10 ڈاکو ہلاک ہو گئے۔
کراچی کے علاقے نیو کراچی انڈسٹریل ایریا میں پولیس مقابلے کے دوران 5 ملزمان مارے گئے۔ پولیس کے مطابق ہلاک افراد کی شناخت ندیم، سرفراز، نوید، آصف اور غلام عباس کے ناموں سے ہوئی ہے۔ ملزمان کے قبضے سے اسلحہ، ایک کار اور موٹر سائیکل برآمد کی گئی۔ پولیس کا کہنا ہے کہ ملزمان عادی جرائم پیشہ تھے اور انہوں نے 20 اپریل کو خواجہ اجمیر نگری میں ڈکیتی کے دوران ایک دودھ فروش کو قتل کیا تھا۔پولیس کے مطابق خفیہ اطلاع پر کارروائی کی گئی، ملزمان نے پولیس کو دیکھتے ہی فائرنگ کی، جس کے جواب میں پانچوں ہلاک ہو گئے۔ادھر پنجاب کے ضلع چنیوٹ میں کاؤنٹر ٹیررزم ڈیپارٹمنٹ (سی ٹی ڈی) اور ڈاکوؤں کے درمیان فائرنگ کے تبادلے میں 3 ڈاکو مارے گئے جبکہ 3 فرار ہو گئے۔ سی ٹی ڈی کے مطابق ہلاک ہونے والوں کی شناخت علی حمزہ، نوید اور غلام رضا کے ناموں سے ہوئی ہے۔ ملزمان کے قبضے سے اسلحہ اور لوٹی گئی رقم بھی برآمد ہوئی۔ایک اور واقعے میں سی ٹی ڈی جڑانوالہ کی کارروائی کے دوران 2 مزید ملزمان ہلاک ہو گئے۔ پولیس کے مطابق یہ کارروائی اشتہاری ملزم کی گرفتاری کے لیے کی جا رہی تھی کہ ملزمان نے فائرنگ کر دی۔ جوابی کارروائی میں دو ملزمان زخمی ہوئے اور بعد ازاں ہلاک ہو گئے، جبکہ دیگر فرار ہونے میں کامیاب ہو گئے۔
