کراچی
کراچی کے علاقے پی ای سی ایچ ایس سے لاپتہ ہونے والا 25 سالہ دکان مالک کئی روز بعد گلستان جوہر سے مردہ حالت میں ملا ہے۔ پولیس کو شبہ ہے کہ مقتول کو قتل کرنے سے قبل تشدد کا نشانہ بنایا گیا۔
مقتول کی شناخت میر رضا علی ولد میر حسن علی کے نام سے ہوئی، جو پی ای سی ایچ ایس بلاک 2 کا رہائشی اور بہادر آباد چورنگی کے قریب میٹھے کی دکان “وافلکس” کا مالک تھا۔
پولیس کے مطابق میر رضا علی کی لاش گلستان جوہر بلاک 1 میں شادی قلعہ شادی ہال کے قریب جھاڑیوں سے برآمد ہوئی، جسے قانونی کارروائی اور پوسٹ مارٹم کے لیے جناح اسپتال منتقل کر دیا گیا۔
ایس ایچ او کامران قریشی نے بتایا کہ ابتدائی تفتیش کے دوران معلوم ہوا ہے کہ مقتول کو فائرنگ سے قبل مبینہ طور پر تشدد کا نشانہ بنایا گیا۔ پولیس کے مطابق لاش ایک سے دو روز پرانی معلوم ہوتی ہے، جبکہ جسم پر جلنے کے نشانات بھی موجود تھے۔
اہل خانہ نے مقتول کی شناخت اس کے کپڑوں اور جسم پر موجود ایک مخصوص نشان کی مدد سے کی۔ پولیس کا کہنا ہے کہ موت کی حتمی وجہ پوسٹ مارٹم رپورٹ آنے کے بعد واضح ہو سکے گی۔
پولیس ریکارڈ کے مطابق میر رضا علی کے لاپتہ ہونے کے بعد فیروز آباد تھانے میں اغوا کا مقدمہ درج کیا گیا تھا۔
ایف آئی آر کے مطابق رضا علی 28 جولائی کی رات اپنی دکان سے گاڑی میں گھر واپس آیا تھا۔ صبح تقریباً 4 بجے اس نے اپنی والدہ کو بتایا کہ وہ چند منٹ کے لیے باہر جا رہا ہے، تاہم وہ واپس نہیں آیا۔
اہل خانہ نے جب اس سے رابطہ کرنے کی کوشش کی تو موبائل فون بند ملا۔ تلاش کے بعد خاندان نے مددگار 15 سے رابطہ کیا اور پولیس کو اطلاع دی، جس پر نامعلوم افراد کے خلاف اغوا کا مقدمہ درج کیا گیا۔
پولیس نے واقعے کی تحقیقات شروع کر دی ہیں اور لاش ملنے والی جگہ کے اطراف سے سی سی ٹی وی فوٹیج حاصل کی جا رہی ہے تاکہ اغوا اور قتل کے محرکات کا سراغ لگایا جا سکے۔
حکام کے مطابق کیس میں مزید پیش رفت شواہد کے تجزیے اور پوسٹ مارٹم رپورٹ کے نتائج سامنے آنے کے بعد متوقع ہے۔
