نیوز ڈیسک
اسلام آباد: پاکستانی اداکارہ اور ٹی وی میزبان فضا علی نے کہا ہے کہ وہ تیسری شادی کے لیے تیار ہیں، تاہم ان کا شریکِ حیات ایسا شخص ہونا چاہیے جو ان کی بیٹی فارال کو قبول کرے اور اس کے حقیقی والد کے ساتھ اس کے تعلق کا احترام کرے۔
ایک حالیہ ٹی وی انٹرویو میں فضا علی نے بتایا کہ ماضی میں ان کا ایک رشتہ شادی تک پہنچ گیا تھا، تاہم ہونے والے شوہر کے خاندان کی جانب سے بیٹی کے حوالے سے ایک شرط سامنے آنے پر انہوں نے یہ رشتہ ختم کر دیا۔
اداکارہ کے مطابق، خاندان فارال کو قبول کرنے اور اسے اپنے ساتھ رکھنے پر آمادہ تھا، لیکن ان کی خواہش تھی کہ بچی کو اس کے حقیقی والد سے ملاقات کی اجازت نہ دی جائے۔
فضا علی نے کہا کہ انہوں نے اس شرط کو قبول نہیں کیا کیونکہ وہ باپ اور بیٹی کے تعلق میں رکاوٹ ڈالنا مناسب نہیں سمجھتی تھیں۔
اداکارہ کی پہلی شادی 2007 میں فواد فاروق سے ہوئی تھی، جس سے ان کی ایک بیٹی فارال ہے۔ یہ شادی تین سال بعد طلاق پر ختم ہوگئی۔
بعد ازاں 2018 میں فضا علی نے کاروباری شخصیت ایاز ملک سے دوسری شادی کی، تاہم یہ رشتہ بھی زیادہ عرصہ قائم نہ رہ سکا۔
انٹرویو میں فضا علی نے پہلی شادی کے خاتمے کے بعد کچھ عرصے کے لیے شوبز سے دور رہنے کی وجوہات بھی بیان کیں۔ انہوں نے اپنے سابق شوہر کو اچھا انسان قرار دیتے ہوئے کہا کہ انہیں کبھی ان کی جانب سے تشدد کا سامنا نہیں کرنا پڑا، تاہم دونوں میاں بیوی کی حیثیت سے اپنے تعلق کو برقرار رکھنے میں کامیاب نہ ہو سکے۔
فضا کے مطابق، علیحدگی کے بعد سیٹ پر بعض لوگ ان کے پاس آکر فواد کے بارے میں منفی تبصرے کرتے تھے، جس کی وجہ سے انہوں نے عارضی طور پر شوبز سے کنارہ کشی اختیار کرلی۔
انہوں نے کہا کہ فواد کے ساتھ ان کے مسائل ذاتی نوعیت کے تھے اور کسی دوسرے شخص کو ان معاملات پر تبصرہ کرنے کا حق نہیں تھا۔
فضا علی نے مزید کہا کہ فواد کا خاندان بہت اچھا تھا، تاہم وہ دونوں اپنی ازدواجی زندگی کو کامیابی سے آگے نہیں بڑھا سکے۔
فضا علی نے کم عمری میں اداکاری اور ماڈلنگ سے کیریئر کا آغاز کیا تھا اور وہ بعد ازاں اداکاری، ماڈلنگ، میزبانی اور گلوکاری کے شعبوں میں اپنی صلاحیتوں کا اظہار کرتی رہی ہیں۔
