پشاور:خیبر پختونخوا میں منکی پاکس (ایم پاکس) کے چار مریض صحت یاب ہو گئے ہیں اور ان کے ٹیسٹ منفی آنے کے بعد انہیں قرنطینہ سے رہا کر دیا گیا ہے۔
میڈیا رپورٹ کے مطابق، محکمہ صحت نے ایک بیان میں کہا ہے کہ جن مریضوں کا قرنطینہ سروسز ہسپتال اور گھروں میں تھا، ان کے ٹیسٹ منفی آنے کے بعد انہیں فارغ کر دیا گیا ہے۔
تاہم، باچا خان انٹرنیشنل ایئرپورٹ اور طورخم پاک افغان بارڈر پر مسافروں کی اسکریننگ معمول کے مطابق جاری رہے گی۔
بیان میں مزید کہا گیا ہے کہ دیگر حفاظتی پروٹوکول بھی برقرار رہیں گے اور ہسپتال علامت دکھانے والے مریضوں کو ٹیسٹ کے لیے بھیجتا رہے گا۔
ڈائریکٹر پبلک ہیلتھ ڈاکٹر ارشاد روغانی کا کہنا ہے کہ محکمہ صحت، پبلک ہیلتھ ریفرینس لیبارٹری اور خیبر میڈیکل یونیورسٹی نے ایم پاکس کیسز کی تشخیص اور انتظام میں اہم کردار ادا کیا ہے۔
ان کا مزید کہنا تھا کہ نگرانی کے نظام کو مزید مضبوط کیا گیا ہے تاکہ کوئی مریض کمیونٹی میں جا کر وائرس پھیلانے کا سبب نہ بن سکے۔
ڈاکٹر ارشاد نے جانوروں سے پھیلنے والی بیماری ایم پاکس سے آگاہی پھیلانے میں علما کے کردار کو سراہا اور امید ظاہر کی کہ ان کے تعاون سے صوبے میں بیماری سے پاک ماحول قائم کرنے میں مدد ملے گی۔
