اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے 16 سے 22 جنوری کے دوران شمالی علاقوں میں شدید برفباری اور بارش کا الرٹ جاری کر دیا ہے۔
این ڈی ایم اے کے مطابق مغربی ہواؤں کے ایک نئے سلسلے کے باعث گلگت بلتستان، بالائی خیبر پختونخوا اور آزاد کشمیر میں شدید بارش اور برفباری متوقع ہے۔ گلگت، ہنزہ، اسکردو، استور، چترال، دیر، مالم جبہ، سوات، بٹگرام، ناران، کاغان، گلیات اور مری میں درمیانی سے شدید برفباری کا امکان ظاہر کیا گیا ہے۔
آزاد کشمیر کے علاقوں نیلم ویلی، مظفرآباد، راولاکوٹ، باغ اور پونچھ میں بھی بارش اور برفباری کی پیش گوئی کی گئی ہے۔
این ڈی ایم اے نے خبردار کیا ہے کہ شدید برفباری کے باعث سڑکوں پر پھسلن، عارضی بندش اور حدِ نگاہ میں کمی کا خدشہ ہے، جبکہ پہاڑی علاقوں میں برفانی تودے گرنے اور لینڈ سلائیڈنگ کا خطرہ بھی بڑھ سکتا ہے۔
ادارے کے مطابق 20 سے 23 جنوری کے دوران پنجاب، سندھ اور بلوچستان کے مختلف علاقوں میں بھی بارش کا امکان ہے، جبکہ خراب موسم کے باعث بجلی کی فراہمی متاثر ہونے کا خدشہ بھی موجود ہے۔
این ڈی ایم اے نے عوام کو ہدایت کی ہے کہ پہاڑی علاقوں میں غیر ضروری سفر سے گریز کریں، اور اگر سفر ناگزیر ہو تو گاڑیوں کے ٹائروں پر حفاظتی زنجیروں کا استعمال یقینی بنائیں۔ شدید سرد موسم کے پیش نظر گرم کپڑوں اور ہیٹرز کے محفوظ استعمال، اور بچوں، بزرگوں اور بیمار افراد کا خصوصی خیال رکھنے کی بھی تاکید کی گئی ہے۔
صوبائی اداروں اور ضلعی انتظامیہ کو ہدایت کی گئی ہے کہ ممکنہ برفباری کے پیش نظر پیشگی اقدامات، ضروری مشینری کی دستیابی اور سڑکوں کی بحالی کے انتظامات یقینی بنائیں۔ سیاحتی مقامات پر آمد و رفت اور رہائشی سہولیات کی دستیابی کو مدنظر رکھتے ہوئے اقدامات کرنے کی بھی ہدایت جاری کی گئی ہے۔
این ڈی ایم اے نے عوام کو مشورہ دیا ہے کہ موسم سے متعلق مستند معلومات کے لیے ٹی وی، ریڈیو، تصدیق شدہ سوشل میڈیا اکاؤنٹس اور پاک این ڈی ایم اے ڈیزاسٹر الرٹ موبائل ایپ سے رہنمائی حاصل کریں۔
این ڈی ایم اے کا کہنا ہے کہ ممکنہ موسمی خطرات کے پیش نظر تمام متعلقہ اداروں کو پیشگی آگاہی اور ضروری اقدامات کے لیے ہدایات جاری کی جا رہی ہیں۔
