پسند کی شادی: دعوت کے بہانے بلا کر جوڑے پر فائرنگ، شوہر ہسپتال منتقل، اہلیہ کی انصاف کی اپیل

راولپنڈی:پسند کی شادی کرنے والے ایک جوڑے پر مبینہ طور پر سرِعام فائرنگ کا واقعہ پیش آیا ہے، جس کے نتیجے میں شوہر شدید زخمی ہو گیا، جبکہ متاثرہ خاتون نے اپنے اہلِ خانہ اور قریبی رشتہ داروں پر حملے کا الزام عائد کرتے ہوئے وزیرِ اعلیٰ پنجاب سے فوری انصاف کی اپیل کی ہے۔
متاثرہ خاتون ایمان، جو مبین کی اہلیہ ہیں، کے مطابق دو ماہ قبل ان کی اپنی پسند سے شادی ہوئی تھی۔ ابتدا میں اہلِ خانہ کی مخالفت کے باوجود بعد ازاں رابطہ بحال ہو گیا تھا اور انہیں یقین دہانی کروائی گئی تھی کہ نکاح کے بعد اب کوئی مسئلہ نہیں ہوگا۔

ایمان کے مطابق جمعہ کے روز ان کی والدہ نے انہیں دعوت پر بلایا۔ جب وہ اپنے شوہر کے ہمراہ گھر سے نکل کر گیٹ سے باہر آئے تو ان پر مبینہ طور پر فائرنگ کر دی گئی۔ حملے کے نتیجے میں ان کے شوہر مبین شدید زخمی ہو گئے، جنہیں فوری طور پر بینظیر بھٹو ہسپتال منتقل کیا گیا، جہاں وہ اس وقت زندگی اور موت کی کشمکش میں ہیں۔
متاثرہ خاتون کا کہنا ہے کہ جائے وقوعہ پر ان کے شوہر نے پولیس کو اپنا بیان ریکارڈ کروایا اور مبینہ ملزمان کے نام بھی بتائے ہیں۔ انہوں نے الزام عائد کیا کہ اگر انہیں یا ان کے شوہر کو مزید کوئی نقصان پہنچا تو اس کی ذمہ داری ان کے گھر والوں اور قریبی رشتہ داروں پر عائد ہوگی، جن میں راجہ تیمور عباسی اور لیاقت شامل ہیں۔
ایمان نے وزیرِ اعلیٰ پنجاب مریم نواز شریف سے اپیل کی ہے کہ واقعے کا فوری نوٹس لیا جائے اور انہیں منصفانہ اور فوری انصاف فراہم کیا جائے۔
پولیس حکام کے مطابق واقعے کی تحقیقات جاری ہیں اور تمام پہلوؤں سے شواہد اکٹھے کیے جا رہے ہیں۔