راولپنڈی پولیس کی کارروائیاں: سیکیورٹی جائزہ، دوہرے قتل کیس میں سزائے موت، منشیات سپلائر کو 9 سال قید
راولپنڈی (ویب ڈیسک): سٹی پولیس آفیسر سید خالد محمود ہمدانی کی ہدایت پر ایس ایس پی آپریشنز ملک طارق محبوب نے پولیس لائنز ہیڈکوارٹرز کی سیکیورٹی کا تفصیلی جائزہ لیا۔
ایس ایس پی آپریشنز نے پوائنٹ وائز ڈیوٹی چیک کی اور موجودہ حالات کے پیشِ نظر اہلکاروں کو الرٹ رہ کر فرائض انجام دینے کی ہدایات دیں۔ انٹری پوائنٹس اور حساس مقامات پر ایلیٹ فورس کے کمانڈوز تعینات ہیں جبکہ سی سی ٹی وی کیمروں کے ذریعے چوبیس گھنٹے مانیٹرنگ جاری ہے۔ واچ ٹاورز کے ذریعے بھی کڑی نگرانی کو یقینی بنایا جا رہا ہے۔ پولیس حکام کا کہنا ہے کہ فول پروف سیکیورٹی کے لیے تمام ممکنہ اقدامات بروئے کار لائے جا رہے ہیں۔
دوہرے قتل کیس میں چار مجرمان کو سزائے موت
راولپنڈی پولیس کی مؤثر تفتیش کے نتیجے میں معزز عدالت نے دوہرے قتل کے مقدمے میں چار مجرمان کو سزائے موت اور مجموعی طور پر 20 لاکھ روپے ہرجانے کی سزا سنا دی۔
عدالت نے مجرم محسن علی، ندیم، امیر حمزہ اور امجد علی کو قتل کے جرم میں سزائے موت اور فی کس 5 لاکھ روپے ہرجانہ ادا کرنے کا حکم دیا۔ مجرمان نے سابقہ دشمنی کی بنیاد پر فائرنگ کر کے دو شہریوں کو قتل کیا تھا۔ واقعہ کا مقدمہ مارچ 2024 میں تھانہ گوجر خان میں درج کیا گیا تھا۔
سی پی او سید خالد محمود ہمدانی نے سنگین مقدمے میں سزائیں سنائے جانے پر ایس ایس پی انوسٹی گیشن اور تفتیشی و لیگل ٹیموں کو شاباش دی۔
منشیات سپلائر کو 9 سال قید
دوسری جانب معزز عدالت نے منشیات فروشی کے مقدمے میں مجرم بلال حیدر کو 9 سال قید اور 80 ہزار روپے جرمانے کی سزا سنا دی۔ ملزم کو اپریل 2025 میں تھانہ ٹیکسلا پولیس نے 1 کلو 460 گرام چرس برآمد ہونے پر گرفتار کیا تھا۔
پولیس حکام کے مطابق ٹھوس شواہد اور مؤثر پیروی کے باعث عدالت نے مجرم کو قرار واقعی سزا سنائی۔ سی پی او نے اس کامیابی پر متعلقہ افسران اور ٹیموں کو سراہتے ہوئے کہا کہ منشیات کے ناسور کے خاتمے کے لیے سخت اقدامات جاری رہیں گے۔
