لبنان (ویب ڈیسک) – حزب اللہ کے نائب سربراہ نعیم قاسم نے کہا ہے کہ اسرائیل کی جانب سے انہیں قتل کرنے کی دھمکیاں خالی ہیں اور ان کا کوئی اثر نہیں۔
روئٹرز کے مطابق نعیم قاسم نے ایک تقریر میں کہا:
“اسرائیل مجھے چھو بھی نہیں سکتا، ہم نے خود کو طویل مقابلے کے لیے تیار کر لیا ہے اور وہ میدان میں حیران رہ جائیں گے۔ یہ کوئی محدود یا معمولی جنگ نہیں۔”
انہوں نے مزید کہا کہ دشمن انہیں ڈرا نہیں سکتا اور جلد ہی دشمن ان کی طاقت بھی دیکھ لے گا۔ نعیم قاسم نے کہا:
“میں نے کل سنا کہ اسرائیلی وزیراعظم نیتن یاہو مجھے قتل کرنے کی دھمکی دے رہا ہے، لیکن موت کا مقررہ وقت ہی انسان کی حفاظت کرتا ہے۔ جب وقت آ جائے تو اسے کوئی نہیں بدل سکتا، اور جب وقت نہ آیا ہو تو اسے کوئی نہیں لے سکتا، اس لیے نیتن یاہو، آپ کی دھمکی بے معنی اور بے اثر ہے۔”
اس دوران، حزب اللہ نے شمالی اسرائیل میں اسرائیلی فوج کے مختلف ٹھکانوں کو راکٹ اور توپ خانے سے نشانہ بنایا۔ ٹیلیگرام پر جاری بیان کے مطابق اسرائيلي شہر صفد کے قریب عین زیطم اڈے پر حملہ کیا گیا، جبکہ سرحدی قصبے بلیدہ کے نزدیک اسرائیلی فوجیوں پر بھی بمباری کی گئی۔
