حیدرآباد: سندھ کے شہر حیدرآباد میں ایک گھر میں خوفناک آتشزدگی کے نتیجے میں ایک ہی خاندان کے تین افراد جاں بحق ہو گئے۔میڈیا رپورٹس کے مطابق یہ افسوسناک واقعہ تعلقہ قاسم آباد کے علاقے علی پیلس کے قریب پیش آیا، جہاں دکانوں کے اوپر واقع ایک رہائشی مکان میں اچانک آگ بھڑک اٹھی جو تیزی سے پھیل گئی۔اطلاع ملنے پر ریسکیو 1122 کی ٹیمیں فوری طور پر موقع پر پہنچیں اور امدادی کارروائیاں شروع کیں۔ اہلکاروں نے گھر کا دروازہ توڑ کر اندر داخل ہو کر آگ پر قابو پانے کی کوشش کی، جہاں سے تین افراد کی جھلسی ہوئی لاشیں برآمد ہوئیں۔ریسکیو حکام کے مطابق جاں بحق افراد میں گھر کے مالک محمد ندیم صدیقی کی اہلیہ، بیٹا اور بیٹی شامل ہیں۔کئی گھنٹوں کی جدوجہد کے بعد آگ پر قابو پا لیا گیا۔ ابتدائی تحقیقات کے مطابق آتشزدگی کی وجہ شارٹ سرکٹ بتائی جا رہی ہے، جبکہ ہلاکتیں آگ کی شدت اور دھویں کے باعث ہوئیں۔
