نیوز ڈیسک
ریاض: یمن کی حوثی ملیشیا کی جانب سے سعودی عرب کے مختلف شہروں پر میزائل اور ڈرون حملوں میں 13 افراد زخمی ہو گئے۔
عرب نیوز کے مطابق ایران کے حمایت یافتہ حوثیوں نے پیر کے روز بیلسٹک میزائلوں اور ڈرونز کے ذریعے خمیس مشیط، ابہا اور طائف کے شہری علاقوں کو نشانہ بنایا۔
اتحادی افواج کے ترجمان میجر جنرل ترکی المالکی کے مطابق حملوں کے نتیجے میں 13 شہری زخمی ہوئے جبکہ سات مکانات اور دو گاڑیوں کو نقصان پہنچا۔
سعودی حکام نے اس سے قبل نجران، خمیس مشیط، جازان اور ابہا سمیت جنوبی علاقوں کے لیے ممکنہ حملوں کے پیش نظر الرٹ جاری کیا تھا، جسے بعد ازاں واپس لے لیا گیا۔
بعد ازاں سعودی سول ڈیفنس نے مملکت کے مغربی اور جنوبی علاقوں میں متعدد انتباہات جاری کیے، جن میں ابہا، جدہ، جازان، طائف، ینبع اور العلا شامل ہیں۔
میجر جنرل ترکی المالکی نے حوثی ملیشیا پر سعودی شہروں اور شہری بنیادی ڈھانچے کو دانستہ طور پر نشانہ بنانے کا الزام عائد کرتے ہوئے کہا کہ حملے کشیدگی میں اضافے اور شہریوں کو خطرے میں ڈالنے کی کوشش ہیں۔
انہوں نے کہا کہ اتحادی افواج سعودی عرب کی خودمختاری، شہریوں اور شہری تنصیبات کے تحفظ کے لیے ضروری اقدامات کریں گی اور کسی بھی جوابی کارروائی میں بین الاقوامی قوانین، اقوام متحدہ کے چارٹر کے آرٹیکل 51 کے تحت حقِ دفاع اور بین الاقوامی انسانی قوانین کی پاسداری کی جائے گی۔
ترجمان کے مطابق اتحادی افواج حوثیوں کی کارروائیوں کو روکنے اور ان کی مبینہ دشمنانہ سرگرمیوں کا مقابلہ کرنے کے لیے ضروری آپریشنل اقدامات جاری رکھیں گی۔
یہ حملے سعودی عرب کو نشانہ بنانے والے حالیہ واقعات کے سلسلے کی کڑی ہیں۔ گزشتہ ہفتے بھی مملکت کے مختلف علاقوں میں حوثی حملوں کے نتیجے میں خواتین اور بچوں سمیت تقریباً 70 افراد کے زخمی ہونے کی اطلاعات سامنے آئی تھیں۔
جمعہ کے روز ریاض اور مدینہ کے علاقوں پر متعدد ڈرون حملوں کے بعد سعودی عرب نے ایسٹ ویسٹ پائپ لائن پر آپریشن بھی عارضی طور پر معطل کر دیا تھا۔
خلیجی ممالک اور اسلامی تنظیموں نے پائپ لائن پر حملوں کی مذمت کرتے ہوئے سعودی عرب کے ساتھ یکجہتی کا اظہار کیا ہے۔
