نیوز ڈیسک
اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر (این ای او سی) نے پوٹھوہار ریجن اور خیبر پختونخوا کے بالائی علاقوں میں 14 سے 17 ستمبر کے دوران موسلادھار بارش اور گرج چمک کے ساتھ طوفان کے امکان کے پیش نظر الرٹ جاری کر دیا۔
این ای او سی کے مطابق اسلام آباد، راولپنڈی، اٹک، چکوال، جہلم، مری، گلیات اور ملحقہ پہاڑی علاقوں میں شدید بارش کا امکان ہے۔
الرٹ میں خبردار کیا گیا ہے کہ بارش کے باعث نشیبی علاقوں، شہری مراکز، ندی نالوں اور برساتی نالوں میں مقامی سطح پر سیلابی صورتحال پیدا ہو سکتی ہے۔
خیبر پختونخوا کے بالائی اضلاع دیر، سوات، بونیر، مالاکنڈ، شانگلہ، بٹگرام، کوہستان، مانسہرہ، ایبٹ آباد اور ہری پور سمیت نوشہرہ، صوابی، مردان، پشاور اور ملحقہ علاقوں میں بھی شدید بارش متوقع ہے۔
این ای او سی کے موسمیاتی تجزیے کے مطابق ایک تیزی سے تشکیل پانے والا موسمی نظام مختصر دورانیے میں شدید بارش کا سبب بن سکتا ہے۔
اتھارٹی نے خبردار کیا ہے کہ پہاڑی علاقوں میں موسلادھار بارش کے نتیجے میں ندی نالوں میں پانی کا بہاؤ اچانک بڑھ سکتا ہے، جبکہ مقامی سطح پر سیلاب اور لینڈ سلائیڈنگ کا خطرہ بھی موجود ہے۔
این ڈی ایم اے نے شہریوں کو ہدایت کی ہے کہ شدید بارش کے دوران نشیبی علاقوں، ندی نالوں اور آبی گزرگاہوں کے قریب جانے سے گریز کریں اور غیر ضروری سفر سے اجتناب کریں۔
حساس علاقوں کے رہائشیوں کو ممکنہ سیلاب اور لینڈ سلائیڈنگ کے خطرے کے پیش نظر محتاط رہنے کی ہدایت کی گئی ہے۔
اتھارٹی نے عوام پر زور دیا ہے کہ وہ مقامی انتظامیہ، محکمہ موسمیات پاکستان اور این ڈی ایم اے کی جانب سے جاری ہونے والی تازہ ترین ہدایات پر عمل کریں۔
این ڈی ایم اے کے مطابق شہری موسم کی تازہ صورتحال، ممکنہ خطرات اور حفاظتی اقدامات سے متعلق مستند معلومات کے لیے ’پاک این ڈی ایم اے ڈیزاسٹر الرٹ‘ موبائل ایپلی کیشن سے بھی استفادہ کر سکتے ہیں۔
