تہران (ویب ڈیسک): ایران کے صدر مسعود پزشکیان نے واضح کیا ہے کہ ایران کسی بھی دباؤ یا دھونس کے آگے سرنڈر نہیں کرے گا اور اپنی سرزمین کے دفاع کی مکمل صلاحیت رکھتا ہے۔
ایرانی صدر نے مشرقِ وسطیٰ میں جاری کشیدگی پر ردعمل دیتے ہوئے کہا کہ ایران ہر قسم کی جارحیت کا مؤثر جواب دینے کی پوزیشن میں ہے۔
فرانسیسی صدر کے ساتھ ٹیلی فونک گفتگو اور سوشل میڈیا پلیٹ فارم “ایکس” پر جاری بیان میں مسعود پزشکیان کا کہنا تھا کہ اپنے دفاع کا حق ہر ملک کو حاصل ہے اور ایران اپنی سرزمین کے تحفظ کے لیے ہر حد تک جائے گا۔
امریکی اڈوں کے استعمال پر اعتراض
ایرانی صدر نے مطالبہ کیا کہ خطے میں موجود امریکی اڈوں کو ایران کے خلاف استعمال کرنا فوری طور پر بند کیا جائے۔ ان کے مطابق ان اڈوں کے ذریعے ہمسایہ ممالک کے ساتھ ایران کے تعلقات خراب کرنے کی کوشش کی جا رہی ہے۔
جنگ بندی سے متعلق مؤقف
مسعود پزشکیان نے کہا کہ جب تک مستقبل میں حملے نہ ہونے کی ضمانت نہیں ملتی، جنگ بندی کی بات بے معنی ہے۔ انہوں نے کہا کہ امریکی اور اسرائیلی حملوں کو نظر انداز کر کے خطے میں امن قائم نہیں کیا جا سکتا۔
عالمی برادری سے مطالبہ
ایرانی صدر نے عالمی برادری پر زور دیا کہ وہ ایران پر ہونے والے حملوں کی مذمت کرے اور حملہ آوروں کو بین الاقوامی قوانین کا پابند بنایا جائے۔
