اسلام آباد ہائی کورٹ میں شہری کی درخواست، عید کے چاند کا فوری اعلان کرنے کی استدعا

اسلام آباد (ویب ڈیسک) – عید کے چاند کے حوالے سے ایک شہری اپنی درخواست لے کر اسلام آباد ہائی کورٹ پہنچ گیا۔ درخواست میں شہری نے عدالت سے استدعا کی ہے کہ عید کے چاند کو دیکھنے کے بعد فوری اعلان کیا جائے تاکہ لوگ تراویح پڑھنے اور خریداری میں مسائل سے بچ سکیں۔

رپورٹس کے مطابق عدالت نے مذہبی امور کی وزارت سے عید کے چاند کی صورتحال پر رپورٹ طلب کر لی ہے۔ سماعت کے دوران چیف جسٹس سرفراز ڈوگر نے ریمارکس دیے کہ چاند نظر آنے پر ہی اعلان کیا جائے گا۔ پہلے مختلف صوبوں سے چاند کی شہادتیں جمع کی جاتی ہیں، اس کے بعد اجلاس کر کے فیصلہ کیا جاتا ہے، اسی لیے بعض اوقات اعلان میں تاخیر ہو جاتی ہے۔

درخواستگذار شہری عبدالله شفیق نے ذاتی حیثیت میں پیش ہو کر عدالت سے استدعا کی کہ رویت ہلال کمیٹی کو حکم دیا جائے کہ چاند کا اعلان جلد کیا جائے۔ انہوں نے موقف اختیار کیا کہ اعلان میں تاخیر سے لوگ تراویح پڑھ لیتے ہیں اور رات دیر سے اعلان ہونے پر مارکیٹوں میں اچانک رش بھی بڑھ جاتا ہے۔

شہری نے مزید کہا کہ انتظامیہ کو امن و امان کے لیے اقدامات کرنے کی ہدایت کی جائے اور عید کی خریداری کے لیے کھلی رہنے والی مارکیٹوں کے علاوہ دیگر مارکیٹیں بند رکھنے کا حکم دیا جائے۔

عدالت نے مذہبی امور کی وزارت سے رپورٹ طلب کرتے ہوئے سماعت ملتوی کر دی، اور ابھی تک اگلی سماعت کی تاریخ مقرر نہیں کی گئی۔