امریکا میں مڈٹرم انتخابات سے قبل صدر ڈونلڈ ٹرمپ نے ایک ایگزیکٹو آرڈر جاری کرتے ہوئے ووٹرز کے لیے شہریت کی تصدیق لازمی قرار دے دی ہے، جس کے بعد سیاسی اور قانونی حلقوں میں بحث شروع ہو گئی ہے۔
امریکی میڈیا کے مطابق اس حکم کے تحت وفاقی سطح پر شہریوں کی فہرستیں تیار کی جائیں گی اور یو ایس پوسٹل سروس کو ہدایت دی گئی ہے کہ وہ صرف انہی افراد کو میل کے ذریعے بیلٹ بھیجے جو ان فہرستوں میں شامل ہوں۔
ایگزیکٹو آرڈر میں ووٹرز کی شہریت کی جانچ کے نظام کو سخت بنانے اور میل اِن بیلٹ کے عمل کو مزید محفوظ بنانے کے اقدامات شامل ہیں۔ اس کے تحت محکمہ ہوم لینڈ سکیورٹی مختلف ڈیٹا بیس کی مدد سے ریاستی سطح پر شہریت کی فہرستیں تیار کرے گا، جو بعد میں ریاستوں کو فراہم کی جائیں گی۔
تاہم ماہرین اور قانونی حلقوں کا کہنا ہے کہ اس حکم کو جلد عدالت میں چیلنج کیا جا سکتا ہے، کیونکہ امریکی آئین کے مطابق انتخابات کے قوانین بنانے اور ان کا انتظام کرنے کا اختیار ریاستوں کے پاس ہوتا ہے۔
صدر ٹرمپ نے اس اقدام کا دفاع کرتے ہوئے کہا کہ یہ انتخابی نظام کو شفاف بنانے میں مدد دے گا، جبکہ ناقدین کے مطابق یہ اقدام اختیارات سے تجاوز اور انتخابی عمل میں مداخلت کے مترادف ہو سکتا ہے۔
یاد رہے کہ ڈونلڈ ٹرمپ ماضی میں بھی امریکی انتخابی نظام میں تبدیلیوں کے حامی رہے ہیں اور 2020 کے انتخابات سے متعلق ان کے دعوے متنازع رہے ہیں۔
