اسلام آباد (ویب ڈیسک)میاں شہباز شریف نے ایران اور امریکی قیادت کے دانش مندانہ اقدام پر شکریہ ادا کرتے ہوئے جنگ بندی کے فیصلے کا خیر مقدم کیا ہے۔
وزیر اعظم شہباز شریف نے کہا کہ امریکا اور ایران سمیت تمام فریقین نے جنگ بندی پر اتفاق کر لیا ہے، وہ ایران اور امریکی قیادت کے اس دانشمندانہ اقدام کو سراہتے ہیں اور دل سے اس کا خیر مقدم کرتے ہیں۔
سماجی رابطے کی ویب سائٹ ایکس پر اپنے بیان میں انہوں نے فریقین کو 10 اپریل کو اسلام آباد آنے کی دعوت دیتے ہوئے کہا کہ آئیں تاکہ تمام تنازعات کے حل کے لیے حتمی معاہدہ طے کیا جا سکے۔ ان کا کہنا تھا کہ فریقین نے شان دار حکمت اور فہم کا مظاہرہ کیا ہے، امید ہے کہ اسلام آباد مذاکرات میں پائیدار امن حاصل کرنے میں کامیابی ملے گی۔
وزیر اعظم کا مزید کہنا تھا کہ فریقین امن و استحکام کے فروغ کے لیے تعمیری انداز میں مصروف رہے اور لبنان سمیت دیگر مقامات پر فوری جنگ بندی پر اتفاق کیا گیا ہے۔ انہوں نے آئندہ دنوں میں مزید خوش خبریاں شیئر کرنے کی خواہش بھی ظاہر کی۔
واضح رہے کہ ایرانی سپریم سیکیورٹی کونسل کے مطابق امریکا کو پاکستان کے ذریعے 10 نکات بھیج دیے گئے ہیں جبکہ ڈونلڈ ٹرمپ نے بھی تصدیق کی ہے کہ تجاویز موصول ہو چکی ہیں۔
ایرانی حکام کا کہنا ہے کہ مذاکراتی نکات میں پابندیاں اٹھانے اور بیرون ملک منجمد ایرانی اثاثوں کی بحالی شامل ہے، جبکہ ایران اور امریکا کے درمیان مجوزہ مذاکرات اسلام آباد میں ہوں گے جہاں حتمی جنگ بندی پر بات چیت کی جائے گی۔
