اسلام آباد: وفاقی حکومت نے مالی سال 2026-27 کے لیے دفاعی اخراجات میں نمایاں اضافے کی تجویز دی ہے، جس کے تحت مجموعی دفاعی بجٹ 3000 ارب روپے تک پہنچنے کا امکان ہے۔
وزیر خزانہ محمد اورنگزیب کی جانب سے قومی اسمبلی میں پیش کردہ بجٹ دستاویزات کے مطابق یہ رقم نظرثانی شدہ 2595 ارب روپے کے مقابلے میں تقریباً 18 فیصد زیادہ ہے۔
مجوزہ تقسیم کے تحت پاک فوج کے لیے 1284 ارب روپے، پاک فضائیہ کے لیے 573 ارب روپے اور پاک بحریہ کے لیے 293 ارب روپے مختص کرنے کی تجویز ہے۔
دفاعی بجٹ میں ملازمین سے متعلق اخراجات کے لیے 967 ارب روپے جبکہ آپریشنل اخراجات کے لیے 743 ارب روپے رکھے گئے ہیں۔
بجٹ دستاویزات کے مطابق یہ اضافہ علاقائی سلامتی کے بڑھتے ہوئے چیلنجز اور دفاعی ضروریات کے تناظر میں کیا گیا ہے۔
دفاعی اخراجات وفاقی بجٹ کا تقریباً 15 فیصد بنتے ہیں، جس کے باعث مالی سال 2026-27 میں ترقیاتی اخراجات کے لیے مالی گنجائش مزید محدود ہونے کا خدشہ ظاہر کیا جا رہا ہے۔
حکومت کے مطابق دفاعی بجٹ میں یہ اضافہ مسلح افواج کی آپریشنل ضروریات اور قومی سلامتی کے تقاضوں کو مدنظر رکھتے ہوئے کیا گیا ہے۔
