اسلام آباد: وزیر اعظم شہباز شریف نے کہا ہے کہ امریکہ اور ایران کے درمیان مجوزہ امن معاہدہ آخری مرحلے کے قریب پہنچ گیا ہے، جو دونوں ممالک کے درمیان طویل کشیدگی میں کمی کی جانب ایک اہم پیش رفت ہے۔
ایکس پر اپنے بیان میں وزیر اعظم نے کہا کہ پاکستان اس عمل کے اگلے مراحل کو حتمی شکل دینے کے لیے تمام فریقوں کے ساتھ فعال طور پر رابطے میں ہے، اور جلد معاہدے پر دستخط کی امید ہے۔
شہباز شریف نے کہا کہ “امریکہ اور ایران امن کے اتنے قریب پہلے کبھی نہیں تھے”، تاہم بعض عناصر اس عمل کو سبوتاژ کرنے کی کوشش کر رہے ہیں مگر وہ ناکام ہوں گے۔
ذرائع کے مطابق وزیر اعظم شہباز شریف ممکنہ دستخطی تقریب میں شرکت کے لیے ہفتے کو ایک اعلیٰ سطحی وفد کے ہمراہ جنیوا روانہ ہوں گے۔
یہ پیش رفت ایسے وقت میں سامنے آئی ہے جب پاکستان امریکہ اور ایران کے درمیان ثالثی کا کردار ادا کرتے ہوئے خطے میں کشیدگی کم کرنے کی کوششوں میں سرگرم ہے۔
ایرانی وزیر خارجہ عباس عراقچی کے مطابق “اسلام آباد مفاہمت” آخری مراحل میں داخل ہو چکی ہے، جبکہ مجوزہ فریم ورک میں پابندیوں میں نرمی، منجمد اثاثوں کی بحالی اور دیگر معاشی شقیں شامل ہونے کی اطلاعات ہیں۔
تاہم ایرانی حکام نے واضح کیا ہے کہ حتمی معاہدہ متعلقہ ریاستی اداروں کی منظوری سے مشروط ہوگا۔
