اسلام آباد: وفاقی دارالحکومت اسلام آباد اور خیبرپختونخوا کے مختلف علاقوں میں ریکٹر اسکیل پر 5.4 شدت کے زلزلے کے جھٹکے محسوس کیے گئے، جس کے باعث شہریوں میں خوف و ہراس پھیل گیا۔
اطلاعات کے مطابق پشاور، مانسہرہ، ایبٹ آباد، صوابی، ہری پور، چارسدہ، مردان اور مالاکنڈ سمیت متعدد علاقوں میں زلزلے کے جھٹکے محسوس کیے گئے۔ زلزلہ محسوس ہوتے ہی لوگ خوف کے باعث گھروں اور دفاتر سے باہر نکل آئے۔
زلزلہ پیما مرکز کے مطابق زلزلے کی شدت ریکٹر اسکیل پر 5.4 ریکارڈ کی گئی، جبکہ اس کا مرکز کوہِ ہندوکش کا پہاڑی سلسلہ تھا۔
زلزلے کے بعد شہریوں نے احتیاطی تدابیر کے طور پر عمارتیں خالی کر دیں اور اپنی سلامتی کے لیے دعائیں مانگتے رہے۔ تاہم فوری طور پر کسی جانی یا مالی نقصان کی اطلاع موصول نہیں ہوئی۔
حکام صورتحال پر گہری نظر رکھے ہوئے ہیں اور کسی بھی ممکنہ نقصان یا اثرات کا جائزہ لے رہے ہیں۔
واضح رہے کہ چند روز قبل پنجاب کے مختلف شہروں سمیت جڑواں شہروں اسلام آباد اور راولپنڈی کے بعض علاقوں میں بھی زلزلے کے شدید جھٹکے محسوس کیے گئے تھے۔ اس زلزلے کی شدت ریکٹر اسکیل پر 4.7 ریکارڈ کی گئی تھی، جس کے باعث شہریوں میں خوف و ہراس پھیل گیا تھا۔
اس موقع پر لاہور، گوجرانوالہ، منڈی بہاؤالدین، جہلم، اوکاڑہ، شیخوپورہ، پھالیہ، ملکوال اور دیپالپور سمیت گرد و نواح کے علاقوں میں بھی زلزلے کے جھٹکے محسوس کیے گئے تھے۔
زلزلہ پیما مرکز کے مطابق اس زلزلے کی گہرائی 18 کلومیٹر تھی، جبکہ اس کا مرکز گوجرانوالہ کے قریب واقع تھا۔
زلزلے کے جھٹکوں کے بعد شہری خوف و ہراس کے عالم میں گھروں اور دفاتر سے باہر نکل آئے اور عبادات و دعاؤں میں مصروف رہے۔ تاہم اس واقعے میں بھی فوری طور پر کسی جانی یا مالی نقصان کی اطلاع سامنے نہیں آئی تھی۔
